Héraðsdómi Reykjaness þykir ekki sannað að Georgios Ntentes hafi ráðið félaga sínum bana á heimili hans á Kársnesi í nóvember í fyrra. Hann var sýknaður af ákærunni í morgun en dómurinn klofnaði því einn dómari vildi sakfella Georgios.
Í dómi héraðsdóms, sem er 108 blaðsíður, kemur fram að ekki verði komist að annarri niðurstöðu en að hinn látni hafi ekki verið einn í íbúð sinni í aðdraganda dánarstundar og að dómurinn velkist ekki í vafa um að honum hafi verið ráðinn bani.
Meirihluti dómsins taldi hins vegar að engar beinar sannanir lægju fyrir um að Georgios hafi myrt hann föstudagskvöldið 28. nóvember í fyrra.
Georgios, sem er grískur ríkisborgari, og hinn látni, Portúgali, höfðu þekkst í nokkur ár og voru ágætir vinir. Georgios heimsótti hinn látna á heimili hans umrætt föstudagskvöld. Hann var hjá honum í rúma klukkustund og sagði þá hafa slakað á og neytt fíkniefna saman.
Hann neitaði því að komið hefði til átaka milli þeirra. Nágrannar mannsins könnuðust ekki við að hafa heyrt skarkala eða önnur hljóð berast frá íbúðinni á þeim tíma sem Georgios var þar, en fyrir liggur að allt var á rúi og stúi og ummerki um að mikið hefði gengið á í íbúðinni þegar maðurinn fannst látinn sunnudagsmorguninn 30. nóvember.
Dánarstund óljós
Stjarfamæling á líkinu gaf ekki nákvæmlega til kynna hve lengi hann hefði verið látinn þegar hann fannst. Réttarlæknir gat ekki útilokað að hann hefði verið á lífi á laugardeginum 29. nóvember eða þann möguleika að hann hefði látist eftir miðnætti 30. nóvember, daginn sem hann fannst.
Ákæruvaldið byggði mál sitt aðallega á því að blóð úr Georgios hefði fundist á vettvangi, sem og blóðug skóför úr tveimur mismunandi skópörunum svipuðum þeim sem Georgios átti hafi fundist á vettvangi.
Georgios sagði að hann hefði hlotið skurðina við mismunandi tilefni, einkum í störfum sínum sem kokkur. Blóð úr honum á vettvangi sagði hann að gæti skýrst af því að hann var með opin sár vegna vinnu sinnar og var að aðstoða hinn látna við að gera upp eldhúsið í íbúðinni.
Skóparið sem hann var í þegar hann heimsótti látna á föstudagskvöldinu, hvítir Nike skór, fannst aldrei. Hann sagðist hafa farið með skóna í Sorpu ásamt öðru dóti því hann og fjölskyldan voru að undirbúa flutning til Grikklands um áramótin.
Engar beinar sannanir
Meirihluti dómsins taldi engar beinar sannanir fyrir því að Georgios hefði myrt hinn látna: hann hafi ekki haft neina áverka sem hægt var að rekja til átaka við hinn látna og þrátt fyrir blóðugan morðvettvang hafi ekkert blóð úr hinum látna fundist á haldlögðum fatnaði ákærða og ekkert blóð fundist í bifreið hans.
Þá taldi meirihluti dómsins að skóför á vettvangi eftir skó af tveimur mismunandi gerðum gætu bent til aðkomu tveggja gerenda. Fram hefði komið að hinn látni hafi átt einn eða fleiri óvildarmenn í tengslum við fíkniefnaviðskipti.
Þá liggi ekki fyrir annað en að Nike og Adidas skór sem ákærði átti séu útbreiddir á Íslandi og annars staðar í heiminum, „og að þrátt fyrir ólíkindablæ á þeirri frásögn ákærða að hann hafi hent sínum hvítu Nike skóm verði að líta til þess að fjölskyldan var að undirbúa flutning til [...] um mánuði eftir að mál þetta kom upp, voru því að sögn ákærða og sambýliskonu hans að losa sig við fatnað og annað dót og vildi ákærði í því sambandi henda gömlum og slitnum hvítum Nike skóm.“
Þá taldi meirihluti dómsins tilgátu ákæruvaldsins um að ástæða meints manndráps hafi snúist um fíkniefni og peninga. Georgios hafi skuldað hinum látna 100 til 200 þúsund krónur og hafi vitað af 80 til 100 grömmum af kókaíni í svefnherbergi hins látna.
„Þessar tvær staðreyndir styðja ekki sérstaklega tilgátu ákæruvaldsins um hvöt að baki því að ákærði dræpi góðan vin; vin sem jafnframt virðist hafa útvegað ákærða kókaín síðustu mánuði fyrir andlát sitt.“
Æskuvinur skuldaði hinum látna margar milljónir
Í dómnum er sett út á nokkur atriði í rannsókn lögreglu. Vitni við rannsókn málsins og fyrir dómi nefndu æskuvin hins látna sem þau sögðu hafa skuldað honum, og raunar fjölda annarra og hættulegri manna, fleiri milljónir. Þá hafi komið fram í vitnisburði að hinn látni hafi látið æskuvin þennan hætta með kærustu sinni, og svo sængað hjá henni sjálfur. Í dómnum segir að lögregla hafi ekki reynt að hafa uppi á æskuvininum í þágu rannsóknar málsins.
Þá segir í dómnum að lögregla hafi lagt mikla áherslu á hvítu Nike-skóna en gefið því minni gaum að hafa uppi á fatnaði sem Georgios var í umrætt kvöld.
Sjaldgæf sýkna í manndrápsmáli
Það verður að teljast mjög óalgengt að sýknað sé af ákærum fyrir manndráp á Íslandi. Á síðustu árum má nefna mál þar sem maður féll fram af svölum í Úlfarsárdal fyrir fimm árum. Þar var maður dæmdur í héraði en sýknaður í Landsrétti.
Í manndrápsmáli á Ólafsfirði í október 2022 var maður dæmdur sekur í héraðsdómi en svo sýknaður í Landsrétti þar sem fallist var á málsvörn hans um neyðarvörn.
