Talsmaður íranska utanríkisráðuneytisins segir írönsk stjórnvöld ekki hafa tekið lokaákvörðun um samkomulag við Bandaríkin. Hann sagði að Íran myndi ekki gera málamiðlanir um „rauðar línur“ í viðræðunum.
Trump fullyrti fyrr í kvöld að sátt hefði náðst milli ríkjanna og að samkomulag yrði líklega undirritað í Evrópu á næstu dögum – jafnvel um helgina. Hann sagði að hann myndi ekki sjálfur undirritað að heldur yrði J.D. Vance varaforseti fulltrúi Bandaríkjanna.
Útför Alis Khamenei, fyrrum æðstaklersk Írans sem féll í árásum Bandaríkjanna og Ísrael í febrúar, hefur verið frestað. Þetta segir borgarstjóri Tehran.
Til stóð að Khamenei yrði borinn til grafar í byrjun júní en hún verður þess í stað haldin í kringum mánaðamótin. Þetta er ekki í fyrst sinn sem útförinni er frestað. Hún átti upphaflega að vera í mars en var frestað vegna stríðsins.
Ef samkomulag verður undirritað milli Bandaríkjanna og Íran ætla Bandaríkin ekki að taka yfir Kharg-eyju, segir Trump. Hann birti færslu á Truth Social í dag þar sem hann sagði að Bandaríkin ætluðu að taka yfir hana í náinni framtíð.
Hann sagðist einnig telja að æðstiklerkur Írans hefði samþykkt meint samkomulag en írönsk stjórnvöld hafa ekki sent frá sér yfirlýsingu eða brugðist við fullyrðingum Trumps.
Trump segir meint samkomulag við Írana fela í sér skilyrði varðandi kjarnorkuáætlun Írana.
„Íranar munu aldrei eiga kjarnorkuvopn, það er allur tilgangurinn með því sem við þurftum að ganga í gegnum til að ná þessu,“ sagði hann við blaðamenn í Hvíta húsinu.
Hormússund verði opnað um leið og samkomulagið hafi verið undirritað. Undirritun verði líklega í Evrópu og jafnvel um helgina.
Írönsk stjórnvöld hafa ekki gefið frá sér yfirlýsingu um samkomulag né brugðist við þessum fullyrðingum Trumps.
Trump segir að Bandaríkin hafi náð sátt við Írana og að hann eigi von á að hún verði undirrituð á næstu dögum. Þetta sagði hann við blaðamenn í Hvíta húsinu. Undirritunin verði líklega í Evrópu.
Heimildir íranska ríkismiðilsins Fars herma að enginn samningstexti sé á samningaborðinu Fars vísar í heimildarmenn tengdum samninganefnd Írana.
Trump sagði í færslu sinni að hann hefði afstýrt þungum árásum sem hann hótaði fyrr í dag vegna þess að góður gangur væri í viðræðum og að báðar hliðar væru sáttar við helstu atriði í viðræðunum.
Donald Trump Bandaríkjaforseti er hættur við að ráðast á Íran af fullum þunga í kvöld eins og hann boðaði fyrir nokkrum klukkustundum. Í færslu á samfélagsmiðlinum Truth Socal í dag sagði Trump að Bandaríkin hefðu í hyggju að taka yfir Kharg-eyju á næstunni, ásamt öðrum olíuinnviðum Írans. Kharg-eyja er meiriháttar olíuvinnslueyja undan ströndum Írans.
Trump dró síðar í land og sagðist efast um að Bandaríkjamenn treystu sér til að taka yfir eyjuna. Nú á sjötta tímanum tilkynnti hann aftur á sama miðli að árásunum væri aflýst vegna þess hve vel viðræður við Íran gengju.
Árásir Bandaríkjanna á Íran héldu áfram í nótt. Í þeim var meðal annars ráðist á þrjú flutningaskip á Óman-flóa með þeim afleiðingum að þrír indverskir sjómenn létu lífið.
Íranar hafa varað við því að vopnahléð milli þeirra og Bandaríkjanna hafi litla þýðingu í ljósi átakanna síðustu sólarhringa. Fulltrúar fjölda ríkja og ríkjabandalaga hafa varað við áframhaldandi stigmögnun og þrýst á ríkin að ná samkomulagi um endalok stríðsins sem allra fyrst.
Yfirvöld í Íran hóta kröftugum hefndaraðgerðum ef Bandaríkin fylgja eftir fyrirætlunum sínum um að taka yfir Kharg-eyju. Bandarísk stjórnvöld hafa sagt eyjuna vera „tengingu fyrir allt olíuframboð Írans“.
Ebrahi Azizi, yfirmaður þjóðaröryggis- og utanríkisstefnunefndar íranska þingsins, lýsti Donald Trump Bandaríkjaforseta sem „rugluðum og óstöðugum“ í samtali við íranska fjölmiðla í dag.
Azizi sagði Írana vera að fullu undirbúna fyrir mögulega atlögu Bandaríkjamanna að eyjunni. Hann sagði viðbúnaðarstig herafla Írans í hámarki á Kharg-eyju.
„Herafli okkar er reiðubúinn, með allan sinn styrk og alla sína getu,“ sagði Azizi.
Stjórnvöld á Indlandi funduðu í dag með Jason Meeks, varasendiherra Bandaríkjanna í Nýju Delí. Tilgangur fundarins var að mótmæla aðgerðum Bandaríkjanna sem leiddu til dauða þriggja indverskra sjómanna á olíuflutningaskipinu Settebello við strendur Óman í gær.
Mennirnir þrír, sem nú hafa verið nafngreindir, gegndu ólíkum hlutverkum á skipinu. Aditya Sharma var skipstjórnarnemi, Shivanand Chaurasia var vélsmiður og Patnala Suresh starfaði sem yfirverkfræðingur.
Skipamálaráðherra Indlands segir dauða sjómannanna þriggja vera tjón sem ómögulegt verður að laga. Hann kveðst vera afar hryggur yfir atvikinu sem sé „hörmulegt.“ Ráðherrann segir að lík mannanna þriggja verði send aftur til Indlands við fyrsta tækifæri.
Hezbollah-samtökin segjast hafa skotið niður dróna ísraelska hersins nærri Bekaa-dalnum í austurhluta Líbanon í dag.
Þetta staðfesta ríkisfjölmiðlar í Líbanon.
Fyrr í dag gerði Ísraelsher loftárás nærri sjúkrahúsi í borginni Týros í suðurhluta landsins.
Einn lést og 17 særðust þegar Ísraelsher gerði loftárás nærri sjúkrahúsi í Týros í dag.
Samkvæmt líbönskum fjölmiðlum hafnaði loftskeyti Ísraelshers á íbúðahúsnæði nálægt sjúkrahúsi í borginni Týros í suðurhluta Líbanons.
Tíu starfsmenn sjúkrahússins særðust, þar á meðal hjúkrunarfræðingar sem urðu fyrir glerbrotum og braki sprengingarinnar. Þá urðu einnig skemmdir á bráðamóttöku sjúkrahússins og sjúkraherbergjum.
Rúmlega 3.700 hafa látið lífið og 11.483 særst frá því árásir Ísraels á Líbanon færðust í aukana í byrjun mars, að því er fram kemur í gögnum heilbrigðisráðuneytis Líbanons.
Donald Trump Bandaríkjaforseta hefur hingað til gengið erfiðlega að fá Írana til að semja um frið eða varanlegt vopnahlé, þrátt fyrir ítrekaðar yfirlýsingar um að samningar séu á næsta leiti.
Árásir Bandaríkjamanna og Ísraelsmanna á Íran hafa haft verulegar efnahagslegar afleiðingar í för með sér um allan heim.
Í Heimsglugga vikunnar er gerð ítarleg grein fyrir átökunum í Mið-Austurlöndum. Þar er meðal annars fjallað um aðgerðir Bandaríkjaforseta og hvaða árangri þær hafa skilað, stríðsrekstur stríðandi fylkinga, þátttöku Ísraels og hættur á langvinnri krísu.
Hægt er að hlusta á Heimsgluggann í spilara RÚV, neðst í fréttinni hér að neðan.
Donald Trump Bandaríkjaforseti segir Bandaríkin ætla að ráðast á Íran af miklum krafti í kvöld.
„Einhvern tímann í ekki svo fjarlægri framtíð ætlum við að taka yfir Kharg-eyju ásamt öðrum olíuinnviðum og ná fullri stjórn á olíu- og gasmörkuðum þeirra, rétt eins og við gerðum við Venesúela,“ segir forsetinn á samfélagsmiðlinum Truth Social.
Í færslunni endurtók hann jafnframt fullyrðingar sínar um að Bandaríkin hafi með árásum sínum eyðilagt alla hernaðarinnviði Írana sem búi þar af leiðandi ekki lengur yfir neinni hernaðargetu.
Hvað er Kharg-eyja? Hvert er mikilvægi hennar?
Kharg-eyja er um þrjátíu kílómetra frá meginlandi Íran, norðarlega í Persaflóa og um 22 ferkílómetrar að stærð. Um 90% af hráolíuútflutningi Írans fer um eyjuna og er hún því afar mikilvæg fyrir efnahag landsins.
Bandaríski herinn hefur ítrekað gert árásir á eyjuna og hafa embættismenn lýst henni sem „tengingu fyrir allt olíuframboð Írans.“ Bryggjur hennar standa út í átt nærliggjandi hafsvæða og dýpt hafnarinnar rúmar risaolíuflutningaskip, sem gerir hana að mikilvægum stað fyrir olíudreifingu.
Ísraelskir hermenn hafa ráðist inn í bæina Ma'ariya og al-Arda í suðurhluta Sýrlands. Í frétt sýrlenskra fjölmiðla er haft eftir embættismanni að fulltrúar ísraelska hersins hafi í dag sett upp eftirlitsstöðvar í bæjunum og hindrað för íbúa.
Muwaffaq Mahmoud, yfirmaður bæjarráðs Abidin og Ma'ariya, segir í samtali við fjölmiðla að ísraelskir hermenn hafi ráðist inn í bæinn á vel búnum herbílum við sólarupprás og komið sér fyrir í grennd við vatnsból.
Sýrlensk yfirvöld hafa ítrekað óskað eftir því að ísraelsk yfirvöld yfirgefi yfirráðasvæði sitt með öllu.
Abbas Araghchi, utanríkisráðherra Írans, ræddi þróun átakanna í Mið-Austurlöndum við Kaju Kallas, utanríkismálastjóra Evrópusambandsins, í gegnum fjarfundarbúnað í dag.
Á fundinum fór Araghchi afar hörðum orðum um árásir Bandaríkjamanna og sagði þær brot á sáttmála Sameinuðu þjóðanna. Hann ítrekaði jafnframt að aðgerðir Bandaríkjamanna hefðu fellt vopnahléið úr gildi og að Bandaríkin bæru ábyrgð á afleiðingum þess.
Þá beindi utanríkisráðherrann spjótum að aðildarríkjum Sameinuðu þjóðanna og sagði þögn hafa ríkt á meðal ríkjanna varðandi árásir Bandaríkjanna á Íran. Slíkt aðgerðarleysi á heimsvísu myndi einungis draga enn frekar úr öryggi og stöðugleika um allan heim.
Utanríkisráðuneyti Sádí-Arabíu hvetur yfirvöld í Íran og Bandaríkjunum til þess að gera allt sem í þeirra valdi stendur til að fyrirbyggja frekari stigmögnun átaka í Mið-Austurlöndum.
Í yfirlýsingu hvetja stjórnvöld í Sádí-Arabíu fulltrúa beggja ríkja til að snúa aftur að samningaborðinu og hefja uppbyggilegar viðræður. Mikilvægt sé að hlífa íbúum Mið-Austurlanda og víðar fyrir afleiðingum endurupptöku stríðsins og að endurheimta öryggi og stöðuleika til lengri tíma.
Hakan Fidan, utanríkisráðherra Tyrklands, tekur í sama streng. Hann segir árásum ríkjanna tveggja verða að linna sem allra fyrst. Þá séu Tyrkir í nánu sambandi við Washington, Teheran og sáttasemjara Pakistan og að mikilvægt sé að ljúka friðarviðræðum og ná samkomulagi.
Vaktin heldur áfram. Ég heiti Mist Grönvold og er hér með tekin við af Brynjólfi Þór.
Giorgia Meloni, forsætisráðherra Ítalíu, segir brýnt að Evrópusambandið sé tilbúið til að beita Íran nýjum viðskiptaþvingunum ef stríðinu í Mið-Austurlöndum ljúki ekki í bráð.
„Ef Teheran heldur áfram á rangri braut verður ESB að vera tilbúið að beita Íran auknum þrýstingi með markvissum aðgerðum,“ sagði Meloni þegar hún ávarpaði Evrópusambandið á fundi í dag.
Íranar segjast hafa lokað alfarið fyrir skipaumferð um Hormússund. Stofnun sem Íranar settu á fót til að stýra umferð og innheimta gjöld sagði í dag að sundinu hefði verið lokað vegna árása Bandaríkjahers við Persaflóa.
Stofnunin vísaði líka til yfirlýsinga íranska byltingarvarðarins í gær um að búið væri að loka Hormússundi fyrir umferð þar til annað verður ákveðið. Bandaríkjaher vísaði því þá á bug að Írönum hefði tekist að stöðva siglingar um sundið.
Þrír indverskir farmenn féllu þegar bandaríski flotinn skaut á flutningaskip sem þeir voru á úti fyrir ströndum Óman. Siglingaráðherra Indlands greindi frá þessu í dag.
Indverjar boðuðu sendiherra Bandaríkjanna á sinn fund til að mótmæla árásinni. Þetta er annað skipið með indverska áhöfn sem verður fyrir árás Bandaríkjamanna í þessari viku. Á mánudag voru 24 skipverjar úr áhöfn skips fluttir frá borði vegna elds sem kviknaði í árás.
Jórdanski herinn segist hafa skotið niður 20 eldflaugar sem Íranar skutu í átt að stjórnstöð Bandaríkjahers í landinu.
Loftvarnakerfi Jórdaníu og konunglegi jórdanski flugherinn skutu niður 20 eldflaugar sem var skotið frá Íran í átt að Azraq-svæðinu í Zarqa-héraði, sagði herinn í yfirlýsingu. Svæðið er um 80 kílómetra austur af Amman, höfuðborg Jórdaníu.
Herinn sagði að þrátt fyrir að talsvert brak hefði fallið til jarðar hefði enginn særst.
Sendinefnd frá Katar fór til Írans til viðræðna við þarlenda ráðamenn. Fundurinn stóð fram á nótt en sendinefndin hélt aftur til síns heima í morgun.
Þetta hefur AFP-fréttastofan eftir ónefndum embættismanni. Hann sagði viðræðurnar hafa átt sér stað að höfðu samráði við Bandaríkjastjórn.
Kínversk stjórnvöld hvetja Bandaríkjamenn og Írana eindregið til að hætta öllum hernaðaraðgerðum.
Lin Jian, talsmaður kínverska utanríkisráðuneytisins, kom stefnu stjórnvalda á framfæri á blaðamannafundi.
„Kína hvetur eindregið til þess að viðeigandi aðilar hætti þegar í stað hernaðaraðgerðum, snúi sér að viðræðum og samningum, bregðist við tilraunum annarra ríkja til að miðla málum og nái saman um víðtækt og varanlegt vopnahlé eins fljótt og auðið er,“ sagði Lin Jian.
Íranska utanríkisráðuneytið fordæmdi í morgun árásir Bandaríkjahers á landið. Í tilkynningu ráðuneytisins segir að árásirnar séu ólöglegar og glæpsamlegar og þar að auki sé þýðingarlaust að halda áfram viðræðum um frið á meðan Bandaríkjamenn haldi árásum sínum áfram.
Íranar vörpuðu allri sök á herðar Bandaríkjamanna.
Góðan dag og velkomin í fréttavakt um hernaðarátök við Persaflóa og víðar í Miðausturlöndum. Ég heiti Brynjólfur Þór Guðmundsson og fylgi ykkur inn í daginn.
Bandaríkjamenn gerðu nýjar árásir á Íran í gærkvöld. Íranir svöruðu með árásum á bandarískar herstöðvar í nágrannaríkjunum. Í fréttinni að neðan má lesa um atburði gærkvöldsins og næturinnar. Nýjustu tíðindi birtast svo hér að ofan.
