Lögregla þurfti að hafa afskipti af hátt í 40 unglingum á Menningarnótt vegna áfengisdrykkju. Jóhann Karl Þórisson, yfirlögregluþjónn, segir áfengisneyslu unglinga vera að færast í aukana.
Valgeir Þór Jakobsson, framkvæmdastjóri Samfés, segir það hafa verið tilfinningu starfsmanna félagsmiðstöðva í dágóðan tíma, að drykkja unglinga sé að færast í aukana.
Hann vill samfélagslegt átak.
Hafa lengi varað við neikvæðri þróun
Valgeir Þór segir að hópamyndun og drykkja unglinga í nótt hafi ekki komið sér mikið á óvart.
Hann segir að starfsfólk félagsmiðstöðva, sem vinni náið með unglingum, hafi lengi verið með sterka tilfinningu fyrir neikvæðri þróun varðandi áfengisdrykkju.
Samfés, landssamtök félagsmiðstöðva og ungmennahúsa eru frjáls félagasamtök sem stofnuð voru í desember 1985 og starfa í þágu ungs fólks um land allt.
„Þú ert að díla við fleiri drykkjutengd vandamál heldur en fyrir 5 árum.“
Valgeir Þór segir það vera sitt faglega og persónulega mat að samfélagið í heild þurfi að fara aftur á byrjunarreit, líkt og gert var í kringum aldamótin. Samfélagslegt átak þurfi til að ná niður aukinni áfengisdrykkju unglinga.
„Ef við viljum sporna við þessu þá líður mér eins og það þurfi samfélagslegt átak upp á nýtt í samheldni foreldra, til dæmis. Hvar við leggjum línurnar.“
Lögregla segir að forvarnir gegn drykkju ungmenna þurfi að byrja heima, hjá foreldrum og börnum. Foreldrar þurfi að vera í góðu sambandi við börnin sín og vita hvar þau eru þegar þau eru ekki heima.
Valgeir Þór tekur undir þau orð en,
„þetta er líka í samfélaginu í heild sinni. Það er hægt að spyrja sig, er drykkjumenning bara sýnilegri en áður?“
Ísland má ekki sofna á verðinum
Valgeir Þór segir að það þurfi að tækla þróunina af hörku, ekki megi sofna á verðinum í forvarnarstarfi.
Langflestir unglingar á Íslandi eru þó í toppmálum, segir Valgeir Þór, og það má ekki gleyma að hrósa þeim.
Hann segir það í höndum fullorðinna að sjá til þess að sá hópur geti haldið áfram að vera í toppmálum með því að sinna forvörnum af fullum krafti.
„Það er heimilin, það er skólinn, það er samfélagið í heild sinni. Það eru íþróttaliðin líka, það eru félagsmiðstöðvarnar. Bara allir sem koma að málefnum barna og ungmenna á Íslandi.“
Reykjavíkurborg hefur undanfarin ár lagt sérstaka áherslu á að á Menningarnótt komi fjölskyldan saman í miðborgina og fari saman heim.
Það er í takt við átakið Verum klár, sem Reykjavíkurborg stendur fyrir, þar sem áhersla er lögð á jákvæð skilaboð til ungs fólks og aðstandenda þeirra um samveru og heilbrigðan lífstíl.
Valgeir Þór segir að þau skilaboð hafi náð til meirihluta foreldra og barna.
„Það er einhversstaðar þar sem það bregst. Og það er ekki hægt að segja átakið eitt og sér. heldur er þetta bara eins og við segjum, ákveðin þróun og menning sem okkur líður eins og við séum búin að vera vör við í uppsiglingu í lengri tíma en bara í ár. “
