Knútur Rafn Ármann, eigandi og framkvæmdastjóri Friðheima, segist hugsi yfir þróun raforkumála hér á landi. Erlend gagnaver horfi hýru auga til íslensku grænu orkunnar og því sé mikilvægt að stjórnvöld forgangsraði málum þannig að heimili smærri fyrirtæki og þjóðhagslega mikilvæg fyrirtæki verði ekki eftir í samkeppni um orkuna.
Ef ekki sé haldið rétt á spilunum gæti það vel farið þannig að raforkuverð á Íslandi verði það dýrasta í Evrópu. Orkan sé jú markaðsvara.
Hólmfríður María heimsótti Friðheima á dögunum á Hljóðvegi 1 og fékk þar að forvitnast um ræktunina, ferðaþjónustuna og áskoranirnar sem fylgja garðyrkju á Íslandi.
Hægt er að hlusta á viðtalið í heild sinni í spilaranum hér fyrir neðan.
Eigum að hafa metnað
„Margir af þeim erlendu gestum sem koma til okkar finnst þetta mjög skrítið að við getum ræktað hér grænmetið allt árið um kring vitandi af því að hér eru langir dimmir og kaldir vetrar. Bara nafnið á landinu okkar, Ísland, það gefur ekki þá vísbendingu,“ segir Knútur.
„En ef maður horfir svolítið á það hvernig við erum að nýta hjálp náttúrunnar — jarðhitann til þess að kynda upp og svo græna rafmagnið okkar til þess að búa til sól eða ljós fyrir plönturnar okkar, allt árið um kring, og síðan með besta vökvunarvatn í heimi, kalda vatnið — lindarvatnið, sem við getum vökvað plönturnar okkar með, að þá er Ísland kjörland fyrir ylrækt,“ heldur hann áfram.
Í raun sé hægt að rækta hvað sem er í íslenskum gróðurhúsum. Ekki nóg með að hægt sé að stýra þáttum eins og rafmagni og hita, heldur sé einnig hægt að gera það á heilbrigðan hátt.
„Auðvitað eigum við sem þjóð að hafa metnað til þess að nýta okkar landsins kosti og gæði til þess að framleiða sem mest af okkar góða grænmeti.“
Gervigreindin á siglingu
Samkeppnin um rafmagn, er það eitthvað sem hræðir þig — á Íslandi?
„Já, ég er svolítið hugsi yfir því. Það sem er að gerast í rafmagnsmálum hér — við getum verið svo stolt af því að allt okkar rafmagn er grænt rafmagn, þannig að við erum með algjörlega „unique“ aðstöðu í heiminum að geta gert þetta með svona grænni orku,“ svarar Knútur.
„Það sem við sjáum að er að gerast í heiminum er að gervigreindin er komin á fljúgandi ferð. Það mun verða mikil eftirspurn eftir gagnaverum — eða það er að segja gagnaver munu spretta hér upp og vilja koma hingað. Þau eru kaupandi sem getur greitt hátt verð og vilja geta skreytt sig með því að vera að nýta grænt rafmagn.“
Takmörk fyrir hvað bændur geta borgað mikið
Knútur segir ekki óhugsandi að þróunin verði sú að á Íslandi verði dýrasta raforkuverð í heimi í ljósi þess hve eftirsótt græna orkan er.
„Og það er erfið staða fyrir svona frumframleiðslugreinar eins og garðyrkjuna.“
Því segir hann gríðarlega mikilvægt að stjórnvöld séu á undan að grípa í taumana.
„Þetta er risastórt mál sem þarf að hugsa hratt. Maður heyrir það í kringum sig að það eru mjög mörg gagnaver á hliðarlínunni sem vilja koma hingað. Þannig að þetta er eitthvað sem er farið að gerast. Orkan er markaðsvara, og hver vill borga hæsta verðið og hver getur borgað hæsta verðið?“
Takmörk séu fyrir því hvað garðyrkjubændur geti borgað hátt verð.
