Forsvarsmenn bandarísku fjölmiðlafyrirtækjanna CNN, MS NOW og Politico greindu frá því í dag að þeir ætluðu í mál við bandarísk stjórnvöld. Þetta gera þau eftir að fjölmiðlunum var meinaður aðgangur að Hvíta húsinu og þeir þannig útilokaðir frá blaðamannafundum forsetans þar.
Donald Trump Bandaríkjaforseti sagðist á föstudag vera búinn að banna starfsmönnum fjölmiðlanna að koma í Hvíta húsið til að sinna störfum sínum. Hann sagði þetta refsingu fyrir að dreifa falsfréttum og varaði aðra fjölmiðla við að þeirra gætu beðið sömu örlög.
Trump hefur ítrekað sakað fjölmiðla um lygar þegar hann er ósáttur við fréttaflutning af störfum sínum. Forsetinn hefur líka oft brugðist illa við og ausið skömmum yfir fréttamenn þegar honum hefur mislíkað spurningar þeirra.
Fjölmiðlarnir þrír segja að ákvörðun Trumps um að banna þeim aðgang að Hvíta húsinu ógni fjölmiðlafrelsi og rétti almennings til óháðrar fréttamennsku sem sé laus við afskipti stjórnvalda.
Bandaríkjastjórn hefur reynt að takmarka störf fjölmiðla meðal annars með nýjum reglum um aðgengi að varnarmálaráðuneytinu sem þykja hafa grafið undan möguleikum blaðamanna til að ræða við heimildarmenn.
