Keir Starmer forsætisráðherra Bretlands segist ekki hafa verið upplýstur um að Peter Mandelson hafi ekki staðist öryggisvottun eftir að hann var skipaður sendiherra í Bandaríkjunum. Starmer skipaði Mandelson sem sendiherra í janúar í fyrra en hann var rekinn í haust vegna samskipta sinna við kynferðisbrotamanninn Jeffrey Epstein. Málið hefur verið pólitískt erfitt fyrir Starmer.
Dagblaðið The Guardian greindi frá því í gær að Peter Mandelson hefði ekki komist í gegnum öryggisvottun í lok janúar 2025. Allir sem skipaðir eru sendiherrar þurfa að fara í gegnum slíka vottun en þar er farið ítarlega í bakgrunn viðkomandi. Keir Starmer hafði þá þegar skipað Mandelson í sendiherraembættið og því var utanríkismálaskrifstofunni nokkur vandi á höndum.
Skrifstofan ákvað að nota heimild sem sjaldan er notuð til að taka fram fyrir hendurnar á niðurstöðunum og veita honum öryggisvottun.
Skella skuldinni á utanríkismálastofnunina
Breska forsætisráðuneytið sendi í gær frá sér yfirlýsingu þar sem frétt Guardian var staðfest. Þar er lögð áhersla á að Starmer hefði ekki vitað af því að öryggisvottun hefði verið hafnað. Ábyrgðin lægi hjá utanríkismálaskrifstofunni.
Olly Robbins, hátt settum embættismanni á skrifstofunni, var vikið úr starfi í gær vegna málsins og hefur verið boðaður til skýrslutöku hjá utanríkismálanefnd fulltrúadeildar breska þingsins á mánudaginn.
„Ófyrirgefanlegt“ að hafa ekki fengið að vita af málinu
Starmer staðfesti efni yfirlýsingarinnar í samtali við fréttamenn í París í morgun, þar sem hann situr fund með forseta Frakklands um opnun Hormús-sunds.
„Það að mér hafi ekki verið sagt að hann hefði ekki fengið öryggisvottun, á sama tíma og ég sagði þinginu að verið væri að fylgja hefðbundnu ferli, er ófyrirgefanlegt. Og ekki nóg með það – enginn ráðherra var upplýstur og ég er öskureiður vegna þess.“
Hann boðaði jafnframt að allar staðreyndir málsins yrðu kynntar á þinginu á mánudaginn.
Krefjast afsagnar Starmers
Stjórnarandstæðingar hafa krafist þess að Starmer segi af sér. Meðal þeirra eru Nigel Farage leiðtogi Umbótaflokksins og Kemi Badenoch leiðtogi Íhaldsflokksins sem bæði telja það ótrúverðugt að Starmer hafi ekki vitað af þessu. Nokkrir þingmenn Verkamannaflokksins, flokks Starmer, taka undir það þó að flestir þeirra sem hafa tjáð sig styðji hann. Þrýstingur á Starmer að segja af sér vegna málsins eykst því enn.
