Dýraverndarsamband Íslands spyr hvað raunverulega vaki fyrir eiganda Hvals hf. með hvalveiðum og veltir upp þeirri spurningu hvort tilgangurinn sé að hafa áhrif á þjóðaratkvæðagreiðslu um framhald aðildarviðræðna við Evrópusambandið.
Hvalur 9 kom í land í nótt með tvær langreyðar sem veiddar voru um helgina, þær fyrstu sem veiddar hafa verið í tvö ár.
Í yfirlýsingu Dýraverndarsambandsins, undirritaðri af Lindu Karen Gunnarsdóttur formanni, segir að hvalveiðarnar séu með öllu tilgangslausar út frá viðskiptahagsmunum Hvals hf. og aðaleiganda þess, Kristjáns Loftssonar. Þrátt fyrir að engar hvalveiðar hafi verið stundaðar í tvö ár, og þar áður verið takmarkaðar, séu enn birgðir af hvalkjöti í frystigeymslum, sem enginn markaður sé fyrir.
„Stóra spurningin er sú hvað raunverulega vakir fyrir Kristjáni Loftssyni úr því að hann tapar aðeins fjárhagslega á veiðunum? Er það að hindra lýðræðislega kjörin stjórnvöld í því að setja lög á hvalveiðar í haust og/eða að hafa áhrif á þjóðaratkvæðagreiðslu um framhald aðildarviðræðna við Evrópusambandið seinnipartinn í ágúst í ljósi þess að Evrópusambandið bannar hvalveiðar?“
Dýraverndarsambandið segir hvalveiðarnar ómannúðlegar og eitt augljósasta brot á lögum um dýravelferð sem hugsast geti. Þar vitnar sambandið í niðurstöðu fagráðs um dýravelferð og eftirlit Matvælastofnunar með hvalveiðum 2022 og 2023.
„Þessu verður ekki lýst öðruvísi en sem villimannslegum veiðum sem eiga sér enga stoð í nútímanum. Dýraverndarsamband Íslands hvetur íslensk stjórnvöld til að binda endi á þessar ónauðsynlegu og ómannúðlegu veiðar hið allra fyrsta.“
