Í dag má búast við breytilegri átt 3-8 metrum á sekúndu og skúrum en vestlægri átt og 3-10 metrum síðdegis. Þurrt verður að kalla norðaustantil á landinu en stöku skúrir þar seinnipartinn.
Á morgun má búast við vestan og suðvestan 5-13 metrum á sekúndu, víða smá skúrum en skýjuðu með köflum á Austurlandi og Austfjörðum.
Hiti verður á bilinu 7 til 14 stig, hlýjast austanlands.
Spár gera þá ráð fyrir suðvestan 5-13 metrum á sekúndu og dálítilli vætu um vestanvert landið á miðvikudag en skýjuðu með köflum á Austurlandi. Hiti verður á bilinu 7 til 12 stig.
Ef marka má spár gengur í austan og norðaustan 8-15 metra á sekúndu á fimmtudag. Það verður rigning og hiti á bilinu 5 til 10 stig á sunnanverðu landinu en rigning, slydda eða snjókoma og kólnar fyrir norðan. Hiti verður um eða rétt yfir frostmarki síðdegis og vægt frost til fjalla.
Spurning hvað kuldapollurinn kemur sterkt inn
Björn Sævar Einarsson, veðurfræðingur á Veðurstofu Íslands, segir enn dálitla óvissu með hið væntanlega kuldakast.
„Það er kuldapollur norðvestur af landinu og spurning hvað hann kemur sterkt inn á landið. Eins og nýjustu spárnar eru frá því á miðnætti þá verður á fimmtudag austan og norðaustanátt, stinningskaldi og rigning á sunnanverðu landinu en kólnar fyrir norðan með rigningu, slyddu eða snjókomu og þá snjókomu til fjalla og hiti verður um eða rétt yfir frostmarki síðdegis en líklega frost á fjöllum.
Svo verða áfram austlægar áttir á föstudag og laugardag og hlýnar smám saman þannig að það verður einhver slydda eða snjókoma með köflum á föstudag og líklega rigning á laugardag um allt land. Svo verður svona einhver smá væta á sunnudeginum.“
Bændur og bílstjórar geti lent í vandræðum
Ekki er ólíklegt að sauðfjárbændur verði fyrir einhverjum óþægindum, sér í lagi þeir sem eru í miðjum sauðburði og eru búnir að sleppa út. Björn segir þá svo sem þekkja þetta. Það verði kalt þannig að þeir þurfi að undirbúa sig hvað það varðar.
Björn nefnir einnig að nú eigi allir að vera búnir að setja sumardekkin undir bíla sína og því geti kuldakastið valdið einhverjum vandræðum í umferðinni. Það verði meira og minna slydda og snjókoma á öllum fjallvegum.
Hann segir kuldakastið sem betur fer ekki eiga að standa lengi yfir og gera megi ráð fyrir að kaldast verði á fimmtudagsnótt.
Hitastig verði þó hærra á suðvesturhorninu og úrkoma eingöngu í formi rigningar.
