Úkraínumenn og Rússar hafa hvorir tveggja lýst yfir vopnahléi á næstu dögum, þó ekki þeim sömu.
Rússnesk stjórnvöld hafa lýst yfir einhliða vopnahléi dagana 8. og 9. maí á Föðurlandsdeginum mikla, sigurdegi síðari heimsstyrjaldarinnar, og hóta stórfelldum eldflaugaárásum á miðborg Kyiv brjóti Úkraínumenn gegn því.
Rússneska varnarmálaráðuneytið sagði á skilaboðaforritinu MAX að Vladimír Pútín, æðsti maður heraflans, hefði ákveðið vopnahléð og vonaðist til að Úkraína virti það. Ella væru almenningur og erlendir sendiherrar hvattir til að yfirgefa borgina í skyndi.
Þarlend stjórnvöld brugðust við með því að boða eigið vopnahlé frá miðnætti 6. maí og sögðu skilaboðin benda til þess að Rússum gæti varla verið alvara með hátíðahöldin og þá tilætlunarsemi að Úkraína virti vopnahlé á hernaðarhátíð þeirra. Engin opinber beiðni þess efnis hefði borist.
Volodymyr Zelensky forseti sagði í gær að rússnesk stjórnvöld óttuðust greinilega að úkraínskir drónar sveimuðu yfir Rauða torginu í Moskvu á Föðurlandsdeginum mikla. Rússar fagna sigurdeginum með mikilli hersýningu á torginu ár hvert.
Hlé hefur verið á vopnahlésviðræðum milli Rússa og Úkraínumanna með milligöngu Bandaríkjamanna eftir að þeir hófu stríðið gegn Íran. Zelensky kom til Barein í gær að ræða við stjórnvöld um samvinnu á sviði varnar- og öryggismála.
