Norðurþing segir að málefni lóðar á Raufarhöfn sem íbúar hafa gagnrýnt harðlega vegna uppsöfnunar gamalla ökutækja, vinnuvéla og lausamuna sé komið í formlegan farveg hjá Heilbrigðiseftirliti Norðurlands eystra (HNE).
Nútíminn fjallaði um málið eftir að íbúi á Raufarhöfn sendi sveitarfélaginu formlega kvörtun og hvatti aðra íbúa til að þrýsta á um aðgerðir.
Íbúar á Raufarhöfn krefjast aðgerða vegna ruslahaugs í miðjum bænum
Í svari við fyrirspurn Nútímans staðfestir Norðurþing að sveitarfélagið sé upplýst um málið.
„Norðurþing er vel upplýst og málið er í farvegi hjá Heilbrigðiseftirliti Norðurlands eystra,“ segir í svari Elvars Árna Lund, sviðsstjóra skipulags- og umhverfissviðs.
Lóðarhafi þegar fengið áskorun
Samkvæmt upplýsingum frá sveitarfélaginu hefur lóðarhafi þegar fengið formlega áskorun um að bæta úr umgengni á svæðinu.
„Málið er í farvegi hjá HNE og hefur lóðarhafi þegar fengið áskorun um tiltekt,“ segir í svarinu.
Þá kemur fram að ábyrgðin liggi hjá lóðarhafa sjálfum.
„Lóðarhafi er ábyrgur fyrir umgengni á sinni lóð.“
Geta látið hreinsa á kostnað eiganda
Norðurþing bendir á að samkvæmt lögum njóti lóðarhafi andmælaréttar og fái tækifæri til að bæta úr áður en gripið sé til frekari aðgerða.
Ef ekkert verði að gert að öllum frestum liðnum geti heilbrigðiseftirlitið hins vegar látið hreinsa lóðina á kostnað lóðarhafa.
„Lögum og reglum samkvæmt hefur lóðarhafi andmælarétt og einnig fær lóðarhafi tækifæri til að bæta úr umgengni. Ef ekkert er að gert að öllum frestum liðnum getur heilbrigðiseftirlitið látið hreinsa lóðir á kostnað lóðarhafa,“ segir í svarinu.
Nútíminn hefur jafnframt sent fyrirspurn á Heilbrigðiseftirlit Norðurlands eystra til að fá nánari upplýsingar um stöðu málsins og hvort frekari aðgerðir séu fyrirhugaðar.
