Framleiðslufyrirtækið og streymisveitan Netflix hefur fjárfest yfir 135 milljarða bandaríkjadala í kvikmyndum og sjónvarpsþáttaröðum á síðastliðnum 10 árum. Upphæðin, sem samsvarar 16.500 milljörðum íslenskra króna, er meira en þreföld verg landsframleiðsla Íslands árið 2025.
Greint er frá þessu á nýjum vef fyrirtækisins, the Netflix Effect eða Netflix-áhrifin.
Vefurinn var settur á laggirnar í tilefni þess að 10 ár eru liðin síðan þjónustusvæði streymisveitunnar margfaldaðist í stærð og fór úr 60 löndum í tæp 200. Á vefsíðunni eru ýmis töluleg gögn um Netflix tíunduð eins og upplýsingar um fjárfestingar fyrirtækisins, samfélagsáhrif og áhorf.
Netflix heldur alla jafna upplýsingum sem þessum nokkuð þétt að sér. Gefst nú tækifæri til að rýna í ýmislegt varðandi streymisveituna, sem er sú vinsælasta í heiminum.
Fyrirtækið heldur því fram að viðskipti þess hafi búið til 325 milljarða bandaríkjadala virðisaukningu fyrir alþjóðlega hagkerfið. Upphæðin samsvarar rétt tæpum 40.000 milljörðum íslenskra króna sem jafngildir áttfaldri vergri landsframleiðslu Íslands í fyrra.
Bæði framleiða og kaupa
Á vefsíðu Netflix-áhrifanna segir að um þrír af hverjum fjórum titlum á streymisveitunni séu ekki framleiddir af Netflix, heldur sé sýningarréttur þeirra keyptur.
„Við kaupum rétt að sýningum á kvikmyndum og þáttaröðum frá kvikmyndaverum, sjónvarpsstöðvum, ríkismiðlum og sjálfstæðum framleiðslufyrirtækjum um víða veröld. Það gefur notendum okkar meira af því efni sem þeir dá og dýrka og styður við höfunda svo þeir geti haldið áfram að framleiða fleiri þáttaraðir og kvikmyndir,“ segir á vefsíðunni.
Fyrirtækið hafi átt í viðskiptum við yfir 3000 fyrirtæki um kaup á sýningarrétti. Í þessu samhengi má benda á að þeir 135 milljarðar bandaríkjadala sem Netflix hefur varið í fjárfestingar ná bæði til framleiðslu fyrirtækisins, svo sem House of Cards, Stranger Things og Eurovision Song Contest: The Story of Fire Saga, og til kaupa á sýningarrétti.
Góður árangur á skömmum tíma
Á síðastliðnum 10 árum hafa titlar sem framleiddir eru af Netflix fengið yfir 1.700 tilnefningar til Óskars-, Emmy-, Grammy-, Golden Globes- og BAFTA-verðlauna. Af þessum tilnefningum hafa yfir 350 þeirra hlotið verðlaun.
Tólf kvikmyndir úr smiðju Netflix hafa fengið tilnefningu fyrir bestu kvikmynd á Óskarsverðlaunahátíðinni. Fyrirtækið hefur átt kvikmynd í flokknum á hverju ári síðan 2019. Það framleiddi til að mynda tvær kvikmyndir sem tilnefndar voru á síðustu Óskarshátíð; Frankenstein og Train Dreams.
Þó hefur engin kvikmynd sem framleidd er af Netflix fært leikstjóra sínum styttuna fyrir bestu kvikmynd enn sem komið er.
Þá hafa 11 kvikmyndir sem framleiddar eru af Netflix verið tilnefndar sem besta teiknimynd á Óskarnum. Kvikmynd Guillermo Del Toros um Gosa sigraði í flokknum árið 2023 og KPop Demon Hunters gerði það í ár.
Síðari teiknimyndin fjallar um suður-kóreskar poppstjörnur sem berjast við djöfla og tröll. Hún er einhver stærsti sigur Netflix-streymisveitunnar síðan fyrirtækið hóf að framleiða eigin þætti árið 2013 með þáttaröðinni House of Cards.
KPop Demon Hunters er sú kvikmynd sem hefur flest áhorf á Netflix, yfir 500 milljónir. Þá hefur lag úr henni, Golden, notið gífurlegra vinsælda. Höfundar lagsins fengu Óskarsverðlaun í ár fyrir besta frumsamda lagið en hlustað hefur verið á það í yfir milljarð skipta á streymisveitum. Þá sat albúm með tónlistinni úr kvikmyndinni í efsta sæti Billboard 200-listans í tvær vikur.
Umsvif um allan heim
Fyrirtækið segir streymisveituna hafa haft mikil samfélagsleg áhrif síðustu 10 ár. Bókanir á flugferðum til Suður-Kóreu hafi til að mynda aukist um fjórðung eftir að KPop Demon Hunters var gefin út.
Þá segir að framleiðsla á vegum fyrirtækisins hafi skapað störf fyrir yfir 425 þúsund manns á tímabilinu.
„Áhrif okkar eru ekki aðeins alþjóðleg. Hver framleiðsla Netflix er líka staðbundin framleiðsla sem skapar störf og styður við vöxt fyrirtækja hvar sem við störfum,“ segir á vefsíðu Netflix-áhrifanna.
Fyrirtækið hafi komið að framleiðsluverkefnum í yfir 50 löndum og á álíka mörgum ólíkum tungumálum. Verkefnin nái til yfir 4.500 bæja og borga um víða veröld.
Netflix oft komið hingað til lands
Óhætt er að segja að þessara áhrifa hafi gætt hérlendis. Fyrsta Netflix-þáttaröðin sem var tekin upp á Íslandi voru þættirnir Sense8 sem hófu göngu sína árið 2015. Síðan þá hafa framleiðslur fyrirtækisins á borð við þáttaraðirnar Lost in Space, The Witcher: Blood Origins og Black Mirror og kvikmyndina Heart of Stone haft viðkomu hérlendis.
Þá hefur Netflix sömuleiðis komið að íslenskri framleiðslu eins og þriðju seríu af Ófærð, uppistandi Ara Eldjárns, Pardon My Icelandic, og Kötlu, sjónvarpsþátta Baltasars Kormáks og Sigurjóns Kjartanssonar.
Á vefsíðu Netflix segir það vekja löngun hjá fólki að heimsækja staði sem það sér í kvikmyndum og sjónvarpsþáttaröðum. Vinsældir Háafoss í Þjórsárdal stórjukust eftir að fossinn vakti athygli í lokaþætti Stranger Things. Þá sagði Arnar Már Ólafsson ferðamálastjóri afþreyingarefni hafa töluverð áhrif á vinsældir Íslands sem komustaðar.
