Javier Milei forseti sagði í sjónvarpsávarpi að Falklandseyjar tilheyrðu Argentínu og því þyrfti að ná þeim af Bretum. Ekki þyrfti að rökræða málið, samningaviðræður væru hreinn óþarfi, eyjarnar væru argentínskar hvort sem væri sögulega eða lagalega séð.
„Falklandseyjar eru framtíð okkar og mikilvægar þjóðinni. Það er engin önnur leið en að endurheimta þær.“ Falklandseyjar eru lítill eyjaklasi út af Suður-Ameríku. Um þær hefur lengi staðið styr.
Eyjarnar hafa verið undir breskum yfirráðum síðan 1833 en Argentínumenn hafa gert tilkall til þeirra síðan 1816 og kalla þær Las Malvinas. Á vordögum 1982 gerði herforingjastjórnin í Argentínu tilraun til að yfirtaka eyjarnar sem lauk með algerum sigri breska hersins 74 dögum síðar.
Þá lágu samtals 907 menn í valnum, þar af þrír almennir borgarar. Margaret Thatcher var forsætisráðherra Bretlands og Leopoldo Galtieri var hershöfðingi og leiðtogi herforingjastjórnarinnar í Argentínu, sem féll árið eftir.
Milei vísaði iðulega til Falklandseyjastríðsins í ávarpinu og vottaði þeim argentínsku hermönnum sem féllu virðingu sína. Olía fannst nýverið við eyjarnar og Milei hótaði aðgerðum gegn breskum fyrirtækjum sem hygðust bora þar.
Árið 2013 greiddu 99,8 prósent íbúa atkvæði í þjóðaratkvæðagreiðslu með því að vera áfram breskt handanhafssvæði með eigin ríkisstjórn og löggjafarþing. Bretland ber ábyrgð á utanríkisstefnu og varnarmálum auk þess að skipa landsstjóra sem er fulltrúi krúnunnar á eyjunum. Íbúarnir eru fullgildir breskir ríkisborgarar.
Eftir að Milei komst til valda hefur krafan um að Argentína taki yfir stjórn eyjanna orðið sífellt háværari.
Milei gæti líka notið stuðnings skoðanabróður síns Donalds Trump Bandaríkjaforseti sem ýjaði að því seinast í gær að hann styddi Breta ekki í mögulegum átökum um eyjarnar, enda hefðu Bretar ekkert stutt stríðsrekstur Bandaríkjanna í Íran.
