Skatturinn mun mögulega krefja nokkrar bílaleigur um allt að 25 milljarða króna samtals vegna meints vangoldins virðisaukaskatts af vátryggingum sem þær hafa selt viðskiptavinum sínum. Bílaleigurnar sem Skatturinn sendi bréf um þetta fyrr á árinu eru allt að átta og þessi upphæð er höfuðstóll virðisaukaskattsins auk álags og vaxta sex ár aftur í tímann. Tekið skal fram og það undirstrikað að Skatturinn hefur ekki tekið ákvörðun um þessa endurálagningu en gæti gert það.
Kristinn Jónasson er skattalögfræðingur hjá KPMG sem gætir hagsmuna einhverra af bílaleigunum. Hann segir að þær hafi verið í góðri trú og það hafi verið mat þeirra að þær þyrftu ekki að greiða virðisaukaskatt af seldum vátryggingum. Bílaleigurnar hafi leitað álits hjá Skattinum um þetta. „Þess vegna er þetta svolítið sérstakt, að koma svo níu árum seinna og taka menn í bólinu eða reyna það – gera einhverja tilraun til þess – þegar menn eru að fara eftir leiðbeiningum sama embættis sem ætlar svo að taka þá og gjörsamlega jarða þá.“
Kristinn segir að ef Skatturinn krefur bílaleigurnar um þessa fjármuni verði það mögulega eitt stærsta skattamálið frá upphafi. Fjallað er um þetta mál í fréttaskýringaþættinum Þetta helst. Þáttinn má hlusta á hér:
Hefur áhrif á stærstu bílaleigur landsins
KPMG vinnur fyrir nokkrar af stærstu bílaleigum landsins að þessu máli, meðal annars Bílaleigu Akureyrar eða Heldi ehf. og Blue Car Rental í Reykjanesbæ. Einhverjar bílaleigur hafa greitt Skattinum virðisaukaskatt af þessum tekjum en alls ekki allar.
Tekjurnar sem deilan snýst um eru peningar sem bílaleigurnar fá þegar þær selja leigutökum sínum vátryggingar á leigutímanum. Á milli 15 og 30 prósent af tekjum bílaleiga fást með sölu vátrygginga til viðskiptavina. Deilan snýst um hvort þessar tekjur séu virðisaukaskattsskyldar eða ekki.
Í tilfelli Bílaleigu Akureyrar gæti Skatturinn krafist allt að níu milljarða króna með álagi og vöxtum fyrir síðustu sex ár, það er að segja ef Skatturinn ákveður að krefja leiguna um þennan virðisaukaskatt.
Í tilfelli Blue Car Rental gæti upphæðin numið rúmlega 3,5 milljörðum króna fyrir síðustu sex ár.
Á þessum tíma hefur Bílaleiga Akureyrar haft rúmlega 70 milljarða króna í tekjur og greitt út 1650 milljónir króna í arð. Blue Car Rental hefur verið með tæplega 30 milljarða króna í tekjur og greitt út rúmlega tveggja milljarða króna arð.
Bílaleigan Blue Car Rental í Reykjanesbæ er ein þeirra sem fengu bréfið frá Skattinum fyrr á árinu. Þetta er ein stærsta bílaleiga landsins með um 3000-3500 bíla til útleigu.
Í ársreikningi bílaleigunnar frá því í fyrra, sem nýlega var skilað til ársreikningaskrár, er fjallað sérstaklega um þessa deilu við Skattinn.
„Á árinu 2026 barst félaginu fyrirspurn frá Skattinum um virðisaukaskattslega meðferð umboðsþóknana sem tengjast þeim hluta starfsemi félagsins sem felst í dreifingu vátrygginga fyrir hönd vátryggingafélags. Sambærilegar fyrirspurnir hafa verið sendar fleiri bílaleigufyrirtækjum á Íslandi sem veita vátryggingafélögum sambærilega þjónustu. Samkvæmt lögunum geta bílaleigur starfað sem dreifingaraðilar vátrygginga að uppfylltum tilteknum skilyrðum og eru slíkir aðilar skráðir hjá Fjármálaeftirliti Seðlabanka Íslands. Á grundvelli slíks samnings og að uppfylltum skilyrðum falla umboðsþóknanir undir undanþágu frá virðisaukaskatti. Félagið hefur þegar veitt svör við fyrirspurninni og er það mat félagsins að virðisaukaskattsleg meðferð umboðsþóknana og önnur atriði sem varða þessa starfsemi séu í fullu samræmi við gildandi lög og reglur. Málið er enn til meðferðar hjá skattyfirvöldum og liggur endanleg niðurstaða því ekki fyrir við undirritun ársreikningsins. Engar færslur eru gerðar í reikningsskilunum vegna fyrirspurnarinnar.“
Boltinn hjá Skattinum
Þegar Kristinn er spurður að því hvað gerist ef bílaleigunum verður gert að greiða Skattinum þetta fé, marga milljarða króna, segir hann að einhverjar þeirra hætti væntanlega rekstri en aðrar geti greitt þessa fjármuni.
En hver er staðan núna? „Það sem gerist næst og það sem rekstraraðilar bílaleiga eru að bíða eftir á Ísland.is með refresh-takkann á hverjum morgni, er að fá einhvern skell, fá þessa formlegu ákvörðun, ákvörðunarbréf Skattsins. Það fer þá í það ferli að það verður kært til yfirskattanefndar, geri ég ráð fyrir. Einhverjir munu kunna að fara beint til dómstóla,“ segir Kristinn sem vonast til að Skatturinn endurskoði mat sitt í skattamálinu gegn bílaleigunum í ljósi raka þeirra.
