Mikinn klofning má greina á afstöðu íbúa á höfuðborgarsvæðinu til borgarlínu. Flestir eru annaðhvort mjög fylgjandi verkefninu - eða alfarið á móti því.
Þetta sýna niðurstöður úr Þjóðmálakönnun Félagsvísindastofnunar Háskóla Íslands um viðhorf til málefna fyrir sveitarstjórnarkosningarnar í maí. Í rannsókn Rúnars Vilhjálmssonar, prófessors í félagsfræði, kemur fram að borgarlínan gæti vart verið umdeildari.
Ríflega 39 prósent íbúa segjast frekar eða mjög mótfallnir framkvæmdinni - og sama hlutfall segist frekar eða mjög fylgjandi.
Stuðningurinn við borgarlínu er mestur í Reykjavík og Hafnarfirði, en andstaðan mest í Garðabæ, Mosfellsbæ og Kópavogi.
Því lengra frá miðborginni - því meiri andstaða
Marktækur munur er á stuðningi við borgarlínuna eftir hverfum í Reykjavík.
Íbúar í miðbæ, vesturbæ og austurbæ Reykjavíkur eru helst fylgjandi framkvæmdinni, í kringum 60 prósent íbúa. Minnsti stuðningurinn er í Árbæ, þar eru níu prósent fylgjandi en sjötíu prósent mótfallin. Flestir eru jafnframt mótfallnir framkvæmdinni í Breiðholti, Grafarvogi, Grafarholti og Úlfarsárdal. Sem sagt - því lengra frá miðborginni sem fólk býr - því meiri andstaða er við borgarlínuna, sem meðal annars er ætlað að auðvelda fólki í úthverfum að sækja vinnu og þjónustu miðsvæðis.
Stuðningur við borgarlínu er mestur meðal stuðningsmanna VG, Pírata og Samfylkingar en minnstur meðal stuðningsmanna Miðflokksins, Flokks fólksins, Sjálfstæðisflokks og Framsóknarflokks.
Nærri þrjú þúsund manns voru í úrtaki könnunarinnar og svarhlutfallið var um fjörutíu prósent.
