Páll Vilhjálmsson skrifar:
Fréttamenn RÚV, með Helga Seljan í broddi fylkingar, reyndu útflutning til Danmerkur á Efstaleitisáróðri um spillingu á Íslandi. Viðskiptahugmyndin var að Berlingske í Danmörku birti fréttir um spillingu á Íslandi. Í framhaldi yrði útflutningurinn gerður að innflutningi og almenningi sagt að Ísland væri gjörspillt, það væri staðfest í útlöndum.
Innflutningurinn á dönskum fréttum um spillingu á Íslandi, búnar til að undirlagi Helga og félaga, hófst síðustu helgi. Sjávarútvegurinn er spilltur (auðvitað) og andlit hans eru tveir Pálar, Steingrímsson skipstjóri og Vilhjálmsson bloggari. Innflutningurinn á maðkaða fjölmiðlamjölinu danska var svo ævintýralega fjarstæðukenndur að enginn fjölmiðill gein við agninu.
Helgi Seljan sat sveittur við á RÚV að hringja í blaðamenn á öðrum fjölmiðlum grátbiðjandi að þeir tækju undir með RÚV að pálísk spilling grasseri á Íslandi, samkvæmt Berlingske - en helsti heimildarmaður Berlingske er einmitt téður Helgi. Aðrir fjölmiðlar tóku ekki að sér dreifingu á maðkaða danska fjölmiðlamjölinu. RÚV stóð einangrað með ónýta söluvöru í höndunum.
RÚV-vinir á alþingi þögðu líka þunnu hljóði. Af er sem áður að var að spillingarfrétt á RÚV leiddi til upphlaups vinstrimanna á alþingi, sem aftur varð tilefni til frétta á ríkismiðlinum. Endurvinnsla hringrásarkerfis fjölmiðla höktir og skröltir þegar tiltrú RÚV er komin í ruslflokk.
Í gær ríkti örvænting á Efstaleiti. Hvorki gekk né rak að safna liði í grátkór um spillingu á Íslandi á grunni frétta samstarfsblaðamannsins á Berlingske, Emil Olsen. Daginn áður hafði Emil birt þriðju fréttina um háskalega spillingu á sögueyjunni. Fréttin er skringileg blanda af hálfíslenskum listamanni á svið gjörninga og dómsmáli í Namibíu þar sem Samherji kemur ekki við sögu heldur innlendir stjórnmála- og embættismenn er seldu kvóta og stungu afgjaldinu í eigin vasa. RÚV endursagði fréttina með sínum hætti og setti á hana krassandi fyrirsögn. ,,Það er spilling í Namibíu ekki á Íslandi." Lykilefnisgrein er tilvitnun í fjármálaráðherra Íslands og varaformann Viðreisnar:
„Þetta er hræðilegt mál,“ segir Daði Már við blaðamann Berlingske. „En það er spilling í Namibíu – ekki á Íslandi.“
RÚV ímyndaði sér að nú myndi allur almenningur taka við sér, rísa upp á afturlappirnar og taka undir með Efstaleitiskórnum jú, víst er spilling á Íslandi við höfum sannfrétt það í áravís á öllum rásum RÚV.
En ekkert gerðist. Þögn, engin viðbrögð. Efstaleiti sat eitt uppi með maðkað danskt fjölmiðlamjöl.
Kristinn Hrafnsson, aðalhöfundur Namibíumálsins ásamt Helga Seljan, gat ekki leynt vonbrigðum sínum. Á Facebook birtir hann mynd af föllnu Berlingske-RÚV fréttinn og skrifar:
Kristinn er sérfræðingur í fjölmiðlaspillingu og iðkar hana af kappi. Í upphafi Namibíumálsins, fyrir bráðum sjö árum, mætti Kristinn galvaskur í viðtal á Moggaog útskýrði spillingartækni blaðamanna:
Þetta verkefni sýnir nauðsyn þess að stunda góða, vandaða og yfirgripsmikla rannsóknarblaðamennsku. Ég held líka almennt séð að þessi birting og þessi umfjöllun sé ákveðinn prófsteinn og prófraun á íslenskt samfélag, og einnig á íslenska fjölmiðla, hvernig þeir matreiða og verka þessi mál, sérstaklega með tilliti til þess hvernig eignarhaldið er þar víða. (feitletr. pv)
Í blaðamannaskólum er kennt að segja hverja frétt eins og hún er, engin frétt sé betri en heimildin fyrir henni. Kristinn er af öðrum skóla. Sérgrein hans er spillt blaðamennska. Þar gildir að ,,matreiða og verka" til að hvítt sýnist svart, sakleysi virðist sekt og ásökun jafngildi sönnun.
Aðferð Kristins, Helga Seljan og Aðalsteins Kjartanssonar í Namibíumálinu var gera ógæfumann, drykkjuræfil og fíkil, að trúverðugri heimild. Í samvinnu við blaðamenn varð til skáldskapur um Samherjamútur í Namibíu.
Fyrir sjö árum trúði fólk spilltustu blaðamönnum Íslands eins og nýju neti. Sakamálarannsókn hófst á Íslandi og í Namibíu. Vinstrimenn á alþingi, Helga Vala þingmaður Samfylkingar og fleiri, útvegðu embætti héraðssaksóknara 200 milljónir í aukafjárveitingu gagngert til að finna fót fyrir ásökunum ógæfumanns og spilltra blaðamanna um Samherjamútur í Afríku.
Ekki hefur fundist arða af sönnunargögnum er sýna mútur Samherja. Hvorki á Íslandi né í Namibíu. Dómsmálið í Namibíu er innlent, varðar engan Íslending eða íslensk fyrirtæki. Hér heima situr héraðssaksóknari á málinu, þorir hvorki að ákæra né fella málið niður. Embættið hefur ekkert í höndunum annað en orð fyllibyttu og fíkils.
Spilling blaðamennskunnar náði ekki hámarki haustið 2019 með Namibíumálinu. Hálfu öðru ári síðar, vorið 2021, réðust blaðamenn til atlögu gegn Páli skipstjóra og fjölskyldu hans með miskunnarlausum hætti. Spilling og siðleysi blaðamanna náði áður óþekktum hæðum. Byrlunar- og símamálið er myllusteinn um háls spilltustu blaðamanna Íslands. Dönsk björgunartilraun breytti engu.
