Þeir sem fundust látnir í gróðureldunum voru flestir erlendir ferðamenn á flótta undan eldunum. Hækkandi hiti hefur skapað kjörskilyrði fyrir hraða útbreiðslu þeirra.
Stærstu eldarnir loga við þorpið Los Gallardos, norðaustur af borginni Almería í Andalúsíu-héraði. Hundruð slökkviliðs- og hermanna hafa barist við eldana þar og hundruð íbúa hafa þurft að yfirgefa heimili sín.
Antonio Sanz, almannavarnarráðherra Andalúsíuhéraðs, sagði að minnst 11 væru látnir, 19 væri saknað og átta slasaðir, þar af fjórir alvarlega. Eldurinn hefði breiðst afar hratt út á svæði þar sem mörg heimili væru í skóglendi. Þá hefur hvass vindur aukið útbreiðsluna enn frekar.
Þeir sem létust voru að reyna að flýja eldana, ýmist á bíl eða hlaupum. Flestir þeirra voru líklega erlendir ferðamenn í heimsókn í þorpinu Bedar sem reyndu að komast undan í gegnum skóglendi. Talið er að minnst fjórir þeirra hafi verið Bretar þar sem þeir fundust í bíl sem var með stýrið hægra megin. Tekið er fram að ekki sé búið að bera kennsl á alla hina látnu.
3.000 hektarar brunnir
Juanma Moreno, héraðsstjóri Andalúsíu, segir afleiðingar eldanna yfirþyrmandi. Ríflega 3.000 hektarar eru nú brunnir, sem jafngildir um 2/3 af flatarmáli Garðabæjar. „Við reynum allt til að aðstoða þá sem eiga um sárt að binda og viðbragðsteymin vinna hörðum höndum að því að hefta útbreiðslu eldanna eins fljótt og hægt er,“ segir Moreno. Hann varar jafnframt við því að líklega myndu töluvert fleiri farast í eldunum en þegar hefur verið staðfest. Pedro Sánchez forsætisráðherra hefur sent samúðarkveðjur til aðstandenda hinna látnu.
Orsök eldsins hefur ekki verið formlega staðfest en yfirvöld í Andalúsíu hafa þó greint frá því að vitni hafi séð neistaflug út frá slitinni raflínu.
Eldurinn kviknaði í upphafi mikillar hitabylgju sem gengur yfir Spán og Frakkland næstu daga. Eins og víða annars staðar hefur hitastig farið hækkandi á Spáni síðustu ár. Hitinn hefur reglulega farið yfir 40 stig í suðurhluta landsins. Síðasta ár var það þriðja heitasta í sögunni á Spáni og 25 sinnum á því ári voru dagshitamet slegin. Þetta ásamt þurrkum hefur skapað skilyrði fyrir mikla gróðurelda. Hátt í 4.000 ferkílómetrar lands brunnu á Spáni í fyrra, sem er met. Það er á við rúmlega helming Vestfjarðakjálkans.
Þessir eldar gætu orðið með þeim mannskæðustu í sögu Spánar. Fjórir fórust í gróðureldum þar í landi allt síðasta ár.
