Anníe Mist Þórisdóttir, tvöfaldur heimsmeistari í CrossFit og ein þekktasta íþróttakona sem Ísland hefur alið, hefur gert grein fyrir afstöðu sinni fyrir þjóðaratkvæðagreiðsluna um hvort hefja eigi aðildarviðræður við Evrópusambandið.
Anníe varð heimsmeistari á CrossFit Games tvö ár í röð, 2011 og 2012, og varð þar með fyrsta konan í sögu mótsins til að verja heimsmeistaratitilinn. Hún hefur alls sex sinnum staðið á verðlaunapalli á CrossFit Games og keppt á allra stærsta sviði íþróttarinnar um árabil.
Í færslu sinni á Facebook segir Anníe að reynsla hennar af því að búa, æfa, þjálfa og keppa víða um heim hafi gefið henni tækifæri til að kynnast ólíkum samfélögum og móta sér skýra sýn á það hvað henni finnist virka best.
Það sé ástæða fyrir því að hún vilji búa á Íslandi.
„Ísland er eitt af velmegunarlöndum heims. Íslendingar hafa í gegnum tíðina byggt upp samfélagið, múrstein fyrir múrstein, og þó samfélagið sé auðvitað ekki fullkomið er svo margt sem hefur tekist vel og ástæða fyrir því að við viljum öll búa hérna.“
Vill gæta þess sem hefur verið byggt upp
Þegar horft sé til framtíðar segir Anníe mikilvægt að Íslendingar hugi vel að því sem þegar hefur verið byggt upp og nefnir þar sérstaklega fullveldið, orkumálin, efnahagslögsöguna, landbúnaðinn og fiskimiðin.
„Ég hef áhyggjur af því að mögulegar breytingar á þessum þáttum gætu haft meiri áhættu í för með sér en ávinning. Ekki bara fyrir okkur heldur fyrir framtíð Íslands, fyrir börnin okkar og barnabörn.“
Hún bendir jafnframt á að Ísland sé nú þegar aðili að NATO, EES, EFTA og Schengen.
Anníe segir mikið rætt um mögulega lægri vexti og lægra vöruverð í tengslum við ESB aðild en að það sé langt frá því að vera sjálfgefið að aðild leysi þau vandamál sem Ísland glímir við.
Hún bendir meðal annars á háa atvinnuþátttöku, há laun og hátt hlutfall fólks sem eigi eigið húsnæði.
Spyr hvað hefði gerst í bankahruninu
Anníe veltir einnig fyrir sér hvernig staða Íslands hefði verið í bankahruninu og Icesave deilunni hefði landið þá verið innan Evrópusambandsins.
„Það er ekki hægt að vita nákvæmlega hvernig sú staða hefði þróast, en mér finnst mikilvægt að við veltum þeim spurningum fyrir okkur áður en við tökum ákvörðun.“
Spyr hún hvaða áhrif aðild hefði haft á efnahagslegt svigrúm Íslands, ákvarðanatöku og möguleika landsins til að bregðast við.
„Eins og er stjórnum við þessu SJÁLF.“
Þá segir hún einnig rétt að hafa kostnaðinn af því að hefja samningsferli í huga.
„Ef maður er nokkuð viss um að maður vilji ekki aðild að ESB, er þá rétt að verja hundruðum milljóna í að „kíkja í pakkann“?“
Vill leita lausnanna hér heima
Anníe segir mikilvægara að beina kröftunum að þeim málum sem Íslendingar geti sjálfir haft áhrif á hér heima.
Hún spyr hvernig hægt sé að lækka vexti, bæta húsnæðismarkaðinn, styrkja samkeppni og lækka kostnað heimilanna.
Hún segist ekki vera að segja öðrum hvernig þeir eigi að greiða atkvæði en hvetur fólk til að kynna sér málin vel áður en það tekur ákvörðun.
„Það er alltaf hægt að gera gott samfélag betra og ég tel að við eigum fyrst og fremst að leita þeirra lausna hér heima.“
Sjálf hefur hún hins vegar tekið sína ákvörðun.
„Þess vegna ætla ég að kjósa NEI við því að hefja samningsviðræður við ESB.“
