Íslenski tölvuleikurinn Beat Battles nýtur gríðarlegra vinsælda innan Roblox, eins stærsta stafræna afþreyingarvettvangs í heimi, um þessar mundir.
Tónlistartæknifyrirtækið Overtune stendur að baki Beat Battles. Fulltrúar Roblox, stærðarinnar tölvuleiks sem er nokkurs konar stafrænt afþreyingarsvæði og samfélagsmiðill, höfðu samband við Overtune að fyrra bragði og buðu fyrirtækinu að búa til sérstakan tölvuleik sem byggði á tónsmíðaforriti þeirra.
Beat Battles snýst um að búa til tónlist og keppa um hver eigi vinsælasta lagið innan Roblox. Leikurinn er eins konar stafræn plötusnúðskeppni eða „DJ-battle“ upp á ensku.
900 þúsund notendur síðustu vikur
Hann hefur verið valinn á lista hjá Roblox yfir leiki sem er gert hátt undir höfði á vettvanginum. Yfir milljón spilarar hafa spilað leikinn síðan í fyrra.
Vel á annað hundrað milljónir heimsækja Roblox daglega.
Sigurður Ásgeir Árnason, framkvæmdastjóri Overtune, segir kynninguna ekki aðeins færa Beat Battles gríðarlegan fjölda spilara heldur líka góða – enda spilarar Roblox skapandi.
„Á seinustu fimm vikum höfum við fengið 900 þúsund notendur í gegnum þetta samstarf,“ segir Sigurður Ásgeir.
„Okkur líður svona dálítið eins og alheimurinn hafi talað. Eins og þetta sé mjög veraldleg eða kosmísk útkoma af því sem við höfum verið að byggja í einhvern tíma.“
