Fjórir sakborningar báru vitni í Héraðsdómi Reykjavíkur í morgun í máli sem varðar hópárás og húsbrot í Holtagerði í Kópavogi aðfaranótt 18. september árið 2021.
Tafir hafa einkennt málið allt frá byrjun rannsóknar þess og ekki er útséð með tafir á málinu því verjandi eins sakborningsins veiktist rétt fyrir aðalmeðferðina. Sakborningar skulu gefa skýrslu í fyrirfram ákveðinni röð og þegar kom að vitnisburði skjólstæðings veika lögmannsins gerði dómari hlé á aðalmeðferðinni til kl. 13 í dag. Óvíst er hvort og hvenær lögmaðurinn getur mætt til þinghaldsins. Stefnt er að því að ljúka aðalmeðferðinni á morgun, föstudag, en óvíst er hvort það tekst.
Sjá einnig: Réttarhöld hafin yfir Gabríel Douane og fimm öðrum vegna hryllingsárásar í Kópavogi
Fyrsti sakborningurinn sem bar vitni í morgun kaus að nýta rétt sinn til að tjá sig ekki um málið og svara ekki spurningum ákæruvaldsins. Vísaði hann í framburð sinn í skýrslutökum hjá lögreglu á sínum tíma.
Sakborningurinn upplýsti jafnframt að staða sín í dag væri mjög góð. Hann hefði farið í átta mánaða fíknimeðferð til Danmerkur og starfaði núna sem múrari. Hann býr með móður sinni og tveimur systrum.
Næstur í vitnastúku var Gabríel Douae Boama. Hann kaus að tjá sig ekki og svara ekki spurningum ákæruvaldsins.
„Ég man voðalega lítið hvað gerðist“
Þriðji sakborningurinn samþykkti að tjá sig um málið en hafði lítið um það að segja vegna minnisleysis um atvikin og vímuástands sem hann var í þegar þau áttu sér stað.
„Ég man voðalega lítið hvað gerðist, eiginlega ekki neitt, það er voðalega lítið sem ég get sagt. Það var bara eitthvert partý, veit ekki hvar, ég man að það voru einhver leiðindi í gangi,“ sagði ungi maðurinn.
Hann mundi óljóst eftir handtöku: „Ég var bara á leiðinni í annað partý eða heim og löggan stoppaði mig og setti mig í járn. Síðan datt ég alveg út.“
Aðspurður sagðist hann ekki muna hvað hann hefði sagt í skýrslutöku lögreglu eftir handtökuna. Réttargæslumaður brotaþola rifjaði þá upp að hann hefði líka gefið skýrslu hjá lögreglu tveimur árum síðar og spurði hvort hann myndi hvað hann hefði sagt þar.
„Ég man það ekki, ég er með gullfiskaminni,“ sagði sakborningurinn þá og hló vandræðalega.
Verjandi mannsins spurði hann út í stöðu hans í dag og sagðist hann starfa sem framleiðslustjóri hjá fæðubótaefnafyrirtæki. „Svo er ég í ræktinni á hverjum degi og með konunni, við erum að safna fyrir íbúð,“ sagði hann.
Fjórði sakborningurinn féllst líka á að tjá sig en mundi lítið sem ekkert frá atburðum. „Ég man bara eftir að hafa verið handtekinn fyrir utan þetta partý, var í bíl, ég var undir áhrifum,“ sagði hann. Hann sagðist ekki muna hverjir hefðu verið með honum í bílnum, hvað hann hefði sagt í skýrslutöku hjá lögreglu og eiginlega ekkert muna frá atburðinum.
Árásarmennirnir sex eru ákærðir fyrir sérstaklega hættulega líkamsárásir gegn fjórum mönnum, húsbrot og eignaspjöll. Brutu þeir gler í útidyrahurð og skemmdu innihurð. Samkvæmt ákæru beittu þeir bareflum, hnífum og hömrum í árásinni.
