Hildur Björnsdóttir, oddviti Sjálfstæðisflokksins, verður borgarstjóri Reykjavíkur, Einar Þorsteinsson, oddviti Framsóknar, verður formaður borgarráðs og Björg Magnúsdóttir, oddviti Viðreisnar, forseti borgarstjórnar.
Þessu greindi Hildur frá á fundi í Viðey þar sem tilkynnt var um meirihlutasamstarf flokkanna þriggja.
Þau Einar og Björg munu síðan eiga vistaskipti 1. júní 2027 þegar Einar tekur við sem forseti borgarstjórnar og Björg sem formaður borgarráðs.
Ari stjórnarformaður Orkuveitu Reykjavíkur
Hildur mun leggja fram þá tillögu að Ari Edwald, oddviti Miðflokksins, verði stjórnarformaður Orkuveitu Reykjavíkur.
„Ég fæ að njóta þess mikla heiðurs að verða borgarstjóri Reykjavíkur,” sagði Hildur og bætti við að flokkarnir þrír væru gríðarlega spenntir fyrir komandi kjörtímabili.
Þegar vaktaskipti verða í Ráðhúsi Reykjavíkur 2. júní mun málefnasamningur flokkanna í formi verkefnalista birtast á vefsíðunni verkefnalisti.is.
„Meirihluti með breiða skírskotun“
Hildur sagði að ýmsir möguleikar hefðu verið á borðinu eftir kosningarnar en að síðastliðinn mánudag hefði Sjálfstæðisflokkurinn gengið til viðræðna um myndun meirihluta við Viðreisn og Framsókn.
„Þetta er meirihluti sem ég tel bestan fyrir Reykjavík. Þetta er meirihluti með breiða skírskotun,” sagði hún og sagði Reykjavík þurfa á stöðugleika að halda. Nauðsynlegt væri að auka traust á borgarstjórnina.
„Hópur nýrra stjórnmálamanna“
Björg Magnúsdóttir sagði að innan flokkanna þriggja væri ofboðslega öflugt fólk úr öllum áttum samfélagsins sem gæti ekki beðið eftir því að bretta upp ermarnar.
„Það má kannski segja að við séum hópur nýrra stjórnmálamanna sem langar að knýja fram breytingar,” sagði Björg og bætti við að hópurinn væri á svipaðri línu og gæti talað saman á heiðarlegan og hreinskiptin hátt.
Þau vildu sjá borgina bjarta og fallega til framtíðar.
Hlustuðu ekki á ákall um breytingar
Einar Þorsteinsson sagði borginni hafa síðustu áratugi verið stjórnað af flokkum sem því miður hefðu ekki hlustað á ákall borgarbúa um breytingar.
„Niðurstaða kosninganna var mjög afgerandi,” sagði hann og nefndi að fólk vildi nýtt upphaf í Reykjavík.
„Þegar við vorum að mynda þennan málefnasamning rann það upp fyrir okkur að við erum sammála um ótrúlega margt,” sagði Einar jafnframt.
Vilja koma fólki hraðar á milli staða
Fram kemur í samstarfssáttmála Sjálfstæðisflokksins, Viðreisnar og Framsóknar að flokkarnir ætli að svara ákalli borgarbúa eftir breytingum.
„Við ætlum að fjárfesta í innviðum hverfanna, stórauka húsnæðisuppbyggingu og koma fólki hraðar á milli staða. Við viljum tryggja samkeppnishæfni borgarinnar með því að styðja við atvinnulíf, menningu og skapandi greinar. Reykjavík á að vera lifandi og skemmtileg, frjálslynd en ekki stjórnlynd og leggja áherslu á að að mæta þörfum en ekki breyta þeim,“ segir í sáttmálanum.
Verkefnalisti meirihlutans:
- Við ætlum að auglýsa eftir vinnustöðum til samstarfs um rekstur leikskóla eða daggæslu.
- Við ætlum að setja okkur mælanleg markmið um aukinn árangur í skólastarfi og stefna að skólakerfi í fremstu röð.
- Við ætlum að hefja samtal við ríkisstjórnina og nágrannasveitarfélög um endurskoðun samgöngusáttmála höfuðborgarsvæðisins, fjármögnun hans og framkvæmdahraða.
- Við ætlum að endurskoða fyrirhugað deiliskipulag við Suðurlandsbraut í samstarfi við hagaðila.
- Við ætlum að endurskoða breytingar á gatnamótum við Höfðabakka.
- Við ætlum að stytta gjaldskyldutíma á bílastæðum í miðborginni í samvinnu við íbúa og fyrirtæki.
- Við ætlum að breyta fyrirliggjandi skipulagi nýrra hverfa í Keldnalandi og Úlfarsárdal og hefja skipulag nýrra framtíðarhverfa á Kjalarnesi, Geldingarnesi, Gufunesi og Granda.
- Við ætlum að lengja opnunartíma sundlauga til kl. 22.
- Við ætlum að ráðast í hagræðingar og stjórnkerfisbreytingar í borgarkerfinu með það að markmiði að auka skilvirkni og draga úr sóun.
- Við ætlum að bjóða út sorphirðu í einu hverfi borgarinnar í tilraunaskyni svo undirbúa megi rekstrarútboð á allri sorphirðu borgarinnar.
- Við ætlum að kortleggja aðstöðumál íþróttafélaga og fjárframlög til þeirra svo forgangsraða megi verkefnum og tryggja jafnræði milli félaga.
- Við ætlum að efla stoðþjónustu við börn inni í skólum borgarinnar.
- Við ætlum að tryggja að öll börn geti tekið þátt í skipulögðu íþrótta- og tómstundastarfi.
- Við ætlum að bjóða tekjulágu eldra fólki 60.000 kr. árlegan frístundastyrk.
- Við ætlum að lækka fasteignaskatta á íbúðarhúsnæði og atvinnuhúsnæði.
- Við ætlum að standa vörð um og efla græn svæði borgarinnar og ráðast í skógræktarátak.
