Gunn og Safran tóku við starfinu árið 2022 og hafa á þeim tíma staðið að baki kvikmyndunum Superman, Supergirl og Clayface auk þáttaraðanna The Penguin, Peacemaker og Lanters. Það lá fyrir að Gunn og Safran höfðu skipulagt útgáfu sjónvarpsefnis til næstu áratuga og kemur afsögnin því á óvart.
Þeir segja ekki alveg skilið við DC-heiminn þar sem Gunn vinnur enn að framhaldsmynd um Superman og eru þeir báðir framleiðendur annarrar kvikmyndar um Batman.
Gunn starfaði áður hjá Marvel sem er helsti keppinautur DC. Hann var leikstjóri þriðju kvikmyndarinnar um ofurhetjuteymið Guardians of the Galaxy en var rekinn um tíma eftir að gamlar og umdeildar færslur á samfélagsmiðlinum X, þá Twitter, litu dagsins ljós. Gunn var hins vegar ráðinn aftur sem leikstjóri eftir að fjöldi fólks lýsti yfir stuðningi við hann. Safran er þekktur sem afkastamikill framleiðandi fjölda DC- og hryllingsmynda.
Jeremy Latcham, fyrrverandi stjórnandi hjá Marvel, mun taka við hlutverki þeirra sem forstjóri og yfirmaður skapandi starfs. Hann kom meðal annars að kvikmyndunum The Avengers, Spider-Man: Homecoming og Iron Man.
Í tilkynningu frá Skydance, sem varð til við samruna Paramount og Warner Bros. Discovery og á því DC-studios, segir að Latcham hafi unnið með bæði Gunn og Safran sem skapandi samstarfsmaður.
„Við hlökkum til að vinna með Jeremy að því að byggja upp næstu kynslóð DC-sagna og efla enn frekar skuldbindingu okkar gagnvart aðdáendum,“ segir í yfirlýsingunni.
Í kjölfar fregnanna hefur Gunn sjálfur tjáð sig á samfélagsmiðlum þar sem hann þakkar aðdáendunum fyrir stuðning við starf þeirra Safran. Hann sé glaður að hafa þegið starfið en segir það jafnframt hafa verið afar krefjandi á tímum.
