Aðalmeðferð Gufunesmálsins fyrir Landsrétti er nú á lokametrunum en búast má við því að Landsréttur kveði upp dóm í málinu eftir rúmlega fjórar vikur.
Verjendur sakborninganna fluttu mál sitt í dag og krefjast þeir lægri refsinga fyrir skjólstæðinga sína. Stefán Blackburn var dæmdur í 17 ára fangelsi í Héraðsdómi Suðurlands í fyrra fyrir sinn hlut í málinu. Verjandi hans, Páll Kristjánsson hæstaréttarlögmaður, segir að Stefán hafi ekki haft ásetning um morð er hann beitti Hjörleif heitinn ofbeldi heldur hafi ásetningurinn verið auðgun, en enda reyndu þremenningarnir að hafa fé af Hjörleifi vegna þess að hann hafi viljað fara til fundar við 17 ára stúlku.
Sjá einnig: Saksóknari vill að stúlkunni verði refsað
Einnig segir lögmaðurinn að rannsókn málsins hafi verið ófullnægjandi, hvorki iðnaðarbil á Kjalarnesi né Tesla bíll sem komu við sögu í brotinu hafi verið rannsökuð með fullnægjandi hætti og skorti á myndbandsupptökur. Sakborningurinn Lúkas Geir Ingvarson hefur játað að hafa veitt Hjörleifi um tíu þung högg. Lögmaðurinn benti á að Stefán gæti ekki borið ábyrgð á því ofbeldi sem Lúkas beitti Hjörleif.
Segir Lúkas hafa verið heiðarlegan og einlægan
Hæstaréttarlögmaðurinn Stefán Kristjánsson er verjandi Lúkasar Geirs, sem einnig hlaut 17 ára fangelsisdóm í héraðsdómi fyrir sinn hlut í málinu. Stefán telur að Lúkas hafi gengist við því af heiðarleika að upplýsa um atvik málsins og þar með axlað ábyrgð. Hann hafi verið einlægur í afsökunarbeiðni sinni til aðstandenda Hjörleif. En hann hafi ekki ætlað að drepa neinn, dómurinn sé því allt of þungur.
Telur sök Matthíasar ósannaða
Sævar Þór Jónsson hæstaréttarlögmaður er verjandi Matthíasar Björns Erlingssonar sem hlaut 14 ára fangelsi í héraðsdómi fyrir sinn hlut í málinu. Saksóknari fyrir Landsrétti hefur krafist 16 ára dóms yfir Matthíasi.
Matthías hefur staðfastlega neitað því að hafa beitt Hjörleif ofbeldi þó að hann hafi verið á vettvangi þar sem voðaverkið var framið. Í ákæru málsins eru, ólíkt hinum tveimur aðalsakborningunum, engar lýsingar á beinu ofbeldi Matthíasar í garð Hjörleifs. Í vitnaleiðslum í Landsrétti á miðvikudag hélt Lúkas Geir því hins vegar fram að Matthías hefði barið Hjörleif með tjakki sem hann hafði meðferðis í bíl sínum. Því neitaði Matthías staðfastlega en ekki hafa fundist lífsýni á tjakknum.
Sævar sagði í Landsrétti að það væri fjarstæðukennt að Matthías sé dæmdur í 14 ára fangelsi, hvað þá 16 ára, eins og saksóknari krefst. Matthías hafi ávallt neitað sök, hafi ekki komið að skipulagningu brotsins, engin gögn í málinu sanni aðild hans að ofbeldi og engin lífsýni eða önnur gögn sanni að hann hafi beitt ofbeldi. Meðákærðu hafi hins vegar viðurkennt ofbeldi, þar á meðal Lúkas, sem viðurkennir spörk sem stemma við áverka brotaþola, sem hafi valdið dauða hans.
