Tölvuleikjaframleiðandinn CCP hefur verið í eigu suðurkóreska fyrirtækisins Pearl Abyss frá 2018. Pearl Abyss hefur nú selt Google og íslenskum fjárfestum allan hlut sinn í fyrirtækinu.
„Í nýjum eigendahópi fyrirtækisins eru margir af helstu stjórnendum CCP og langtímafjárfestar, til að mynda sjóðstýringarfélagið Aldir ehf. og fjárfestingafélagið Omega ehf. auk bandaríska tæknifyrirtækisins Google,“ segir í tilkynningu frá félaginu.
Viðskiptin eru sögð nema rúmlega 15 milljörðum króna.
Hefur tilfinningalegt gildi
Hilmar Veigar Pétursson er einn stofnenda fyrirtækisins og hefur leitt hóp fjárfesta við að kaupa það aftur af suðurkóreska félaginu. Hann verður áfram forstjóri þess.
Hilmar Veigar segir í þættinum Sögur úr raunveruleikanum á Rás 1 að kaupin hafi mikið tilfinningalegt gildi. „Það er mikilvægt að starfsfólk og stjórnendur eigi part í fyrirtækinu. Þetta er bara fyrirbæri sem virkar rosalega vel.“
Í þættinum rekur hann fjöruga atburðarás bak við tjöldin áður en viðskiptin fóru fram. Við sögu koma meðal annarra þeir Elon Musk, eigandi SpaceX, xAI og Teslu og Nóbelsverðlaunahafinn Demis Hassabis, stofnandi DeepMind.
Vilja þróa gervigreindarlíkön í EVE
CCP er þekktast fyrir tölvuleikinn EVE Online sem kom fyrst út 2003 og nýtur enn mikilla vinsælda. Leiknum má lýsa sem eins konar herkænskuleik þar sem spilarar berjast um völd og yfirráð úti í geimnum.
Samhliða viðskiptunum hefur Fenris Creations samið við Google DeepMind um að þróa gervigreindarlíkön í ótengdri útgáfu af EVE. DeepMind er leitt af Demis Hassabis og hefur meðal annars þróað gervigreindarlíkönin AlphaGo, AlphaZero og AlphaStar. Það síðastnefnda var þróað til að spila tölvuleikinn StarCraft 2.
Demis Hassabis og samstarfsmenn hans hjá DeepMind hlutu Nóbelsverðlaun í efnafræði 2024 fyrir að þróa gervigreindarlíkanið AlphaFold sem spáir fyrir um þrívíða lögun próteina.
Þeir Demis Hassabis og Hilmar Veigar hafa þekkst í rúman áratug og hafa oft rætt um mögulegt samstarf. Í þættinum Sögur úr raunveruleikanum segir Hilmar Veigar frá því hvers vegna þeir rugla nú reytum.
„Við Hilmar höfum þekkst í mörg ár og ég hef verið mjög hrifinn af hans störfum. Það er mér mikið ánægjuefni að ganga til samstarfs við hann og hið frábæra teymi hjá Fenris Creations með það markmið að kanna nýja leikjaupplifun og efla rannsóknir á gervigreind með öruggum hætti innan leikmannadrifins heims sem er jafn ótrúlega flókinn og EVE Online,“ segir Demis Hassabis í tilkynningunni.
Þar kemur fram að rannsóknirnar sem þeir hyggist ráðast í saman verði gerðar „innan heimslíkans EVE, til dæmis á langtímaáætlanagerð, minni og sínámi. Google DeepMind mun vinna með ótengda útgáfu af EVE-heiminum, sem keyra mun á staðbundnum netþjóni.“
Forðast rugling við kínverska kommúnistaflokkinn
Hilmar Veigar segir að innan CCP hafi löngum verið vitað að nafn fyrirtækisins gæti mögulega bakað því vandræði. Á ensku er kínverski kommúnistaflokkurinn nefnilega skammstafaður CCP. Eftir því sem umsvif fyrirtækisins hafa aukist og gervigreindarstríðið milli Bandaríkjanna og Kína harðnað þá hafa þau vandræði látið á sér kræla.
Hér má heyra Hilmar Veigar lýsa vandræðunum við nafnið CCP.
Óbreytt starfsemi fyrirtækisins
Hilmar Veigar segir viðskiptin með CCP, nú Fenris Creations, ekki fela í sér breytingu á starfseminni. Höfuðstöðvar verða áfram á Íslandi og starfsstöðvar í London og Sjanghaí haldast óbreyttar. Í nýrri stjórn Fenris Creations verða Arnar Ragnarsson, Adrian Bolton, Hilmar Veigar Pétursson og Birgir Már Ragnarsson sem tekur á ný við hlutverki stjórnarformanns fyrirtækisins.
„Síðasti ársfjórðungur árið 2025 var næsttekjuhæsti ársfjórðungur EVE Online í rúmlega 20 ára sögu leikjarins og nóvember sl. var mettekjumánuður. CCP var með yfir 70 milljónir Bandaríkjadala í tekjur á síðasta ári sem endurspeglar langtímaþátttöku spilara og gerir félaginu kleift að fjárfesta áfram í framtíð EVE heimsins,“ segir í tilkynningu Fenris Creations.
