Helgi Magnús Gunnarsson, hæstaréttarlögmaður og fyrrverandi vararíkissaksóknari, segir Sjálfstæðisflokkinn bera mesta ábyrgð á stöðunni í málefnum hælisleitenda. Flokkurinn hafi engan trúverðugleika í þeim málum og honum sé ekki treystandi til að breyta stefnu sinni, þótt hann tali nú með öðrum hætti í von um atkvæði.
Þetta kemur fram í færslu sem Helgi Magnús birti á Facebook laugardaginn 31. október. Hann lét af embætti vararíkissaksóknara árið 2025.
Gagnrýni Helga Magnúsar beinist að ábyrgð Sjálfstæðisflokksins á málaflokknum og því hvernig flokkurinn hafi farið með dómsmálaráðuneytið á árunum 2013-2024. Hann orðar það svo í færslunni:
„Hann hefur skipað dómsmálaráðuneytið meira og minna 2013-2024 þegar mesta ruglið var.“
Helgi Magnús sakar flokkinn jafnframt um að hafa gert undantekningar og gripið fram fyrir hendur Útlendingastofnunar. Í því sambandi nefnir hann veitingu ríkisborgararéttar og heldur eftirfarandi fram:
„Þau gerðu fjölda undantekninga og tóku fram fyrir hendur útlendingastofnunar. Meðal annars til að veita albönskum glæpamanni ríkisborgararétt og öðrum sem tilheyrði bræðralagi múslima.“
Afstaða hans til þess hvort treysta megi Sjálfstæðisflokknum fyrir stefnubreytingu er afdráttarlaus. Að mati Helga Magnúsar nægir málflutningur flokksins nú ekki til að skapa honum trúverðugleika eftir það sem hann lýsir í færslunni. Hann tengir þann málflutning við viðleitni til að afla atkvæða:
„Flokkurinn hefur engan trúverðugleika í þessum efnum og er ekki treystandi til að gera breytingar á stefnu sinni þótt það henti þeim tímabundið að tala svona í von um atkvæði.“
Ummælin koma á meðan útlendingamál hafa verið ofarlega í umræðunni síðustu daga, meðal annars eftir heimsókn pakistanska trúarleiðtogans Muhammad Taqi Usmani í Stórmoskuna í Reykjavík.
