Fulltrúar Evrópu munu taka þátt í næstu lotu friðarviðræðna Úkraínu og Rússa. Þetta sögðu þeir Volodymyr Zelensky Úkraínuforseti og Jared Kushner, annar erindreka Bandaríkjastjórnar.
Fulltrúar Bandaríkjastjórnar, þeir Jared Kushner og Steve Witkoff, funduðu með Zelensky í Dyflinni á Írlandi í gærkvöld. Þeir eru nýbúnir að funda með Pútín Rússlandsforseta í Kreml.
Bandarísku erindrekarnir munu hafa gert Zelensky grein fyrir niðurstöðum fundarins með Pútín og sögðu þeir að fulltrúar Evrópuríkja myndu taka þátt í næstu friðarviðræðum.
„Við getum ekki gengið frá þessu samkomulagi án þess að Evrópuríkin eigi sæti við samningaborðið,“ sagði Kushner á fundinum í Dyflinni.
Fyrir fundinn hafði Zelensky gert ljóst að hann ætlaði ekki að gefa af kröfum sínum um yfirráð yfir hluta af Úkraínu sem Rússar hafa hernumið. Sendinefndir Bandaríkjanna funduðu með fulltrúum Úkraínu og Rússlands í Abú Dabí fyrr í vikunni og eftir það sagðist Zelensky ánægður með gang viðræðnanna. Ekki er vitað hvenær næsta lota friðarviðræðna hefst.
