Samninganefndir Bandaríkjanna og Írans hafa samþykkt viljayfirlýsingu um 60 daga framlengingu vopnahlés milli ríkjanna og upphaf viðræðna um kjarnorkuáætlun Írans. Samkomulagið er þó háð samþykki Donalds Trumps Bandaríkjaforseta. Þetta hefur Axios eftir tveimur bandarískum embættismönnum auk heimildarmanns sem á aðild að samningaviðræðunum.
Fáist Trump til að samþykkja samninginn yrði það þýðingarmesti áfanginn í átt að friði í Mið-Austurlöndum frá því að stríð Írans og Bandaríkjanna hófst. Samkomulag sem næði yfir allar kröfur Trumps er varða kjarnorkuáætlun Írans krefst þó frekari viðræðna.
Felur í sér óhefta för skipa um Hormússund
„Þetta er samkomulag sem dregur alla að borðinu. Við munum ná saman um smáatriðin í samningaviðræðum,“ segir annar heimildarmaður Axios innan úr bandaríska stjórnkerfinu. Heimildarmenn miðilsins segja að samningsdrögin hafi verið samþykkt af æðstu stjórnendum Írans. Írönsk stjórnvöld hafa ekki staðfest það.
Samkomulagið felur í sér að för skipa um Hormússund verði ótakmörkuð. Íranar þurfa að fjarlægja öll tundurdufl úr sundinu innan 30 daga og Bandaríkin þurfa að aflétta herkví sinni verði samkomulagið samþykkt. Þá þyrftu Bandaríkin einnig að aflétta viðskiptaþvingunum til þess að Íranar geti selt olíu úr landinu.
Samkomulagið kveður auk þess á um að stríði Ísraels og Hezbollah-samtakanna í Líbanon ljúki.
Árásir halda áfram þrátt fyrir vopnahlé
Brothætt vopnahlé stendur enn á milli ríkjanna, í það minnsta í orði.
Bandaríkjaher gerði í gærkvöld árásir á hernaðarleg skotmörk í Íran. Þeim árásum var svarað þegar íranski byltingarvörðurinn gerði árás á bandaríska herstöð.
Í gær glæddust vonir um að friðarsamkomulag milli ríkjanna væri í augsýn. Þá greindu ríkisfjölmiðlar í Íran frá samningsdrögunum. Stjórnvöld í Washington voru fljót að svara fréttaflutningnum og sögðu hann uppspuna frá rótum. Ekki væri hægt að treysta neinu sem fram kæmi í írönskum fjölmiðlum.
