Búist er við miklum töfum við landamæraeftirlit við Ermarsundið milli Bretlands og Frakklands næstu daga.
Nýlega voru teknir í notkun fingrafaraskannar auk andlitsgreiningartækni við landamæraeftirlit að kröfu Evrópusambandsins. Landamæraeftirlitskerfið nefnist Entry exit og hefur verið tekið í notkun hér á landi.
Bretar munu flykkjast yfir Ermarsundið næstu daga nú þegar sumarleyfistímabilið er að hefjast og hafa þingmenn varað við ringulreið og löngum biðröðum, slaki Evrópusambandið ekki á kröfum sínum.
Evrópusambandið segir það þó ekki vera á dagskrá. Bæði frönsk og bresk yfirvöld hafa samþykkt að fjölga starfsmönnum við landamæraeftirlit tímabundið.
Fjögurra og hálfs tíma bið í maí
Hafnaryfirvöld í Dover segja að samhliða skólafríi um miðjan maí hafi biðin í landamæraeftirlitinu verið um fjórar og hálf klukkustund. Búist er við því að umferð bíla með ferjum yfir Ermarsund verði um 50% meiri í sumar en um miðjan maí. Gert er ráð fyrir að 12 þúsund bílar fari þessa leið næstu helgi, þrefalt fleiri en að jafnaði yfir árið, að því er segir í frétt The Guardian.
Frá því í apríl hafa breskir ríkisborgarar þurft að skrá sig með rafrænum hætti við komu og brottför til og frá Schengen-svæðinu. Í ferlinu er vegabréf þeirra skannað, viðkomandi gefur fingraför og tekin er andlitsmynd.
