Umboðsmaður Alþingis hefur lokið meðferð sinni á kvörtun fanga á Litla-Hrauni yfir aðbúnaði í fangelsinu. Var hann ósáttur við aðbúnað í eldhúsinu á sinni deild og einnig sturturnar.
Kvörtunin barst í síðasta mánuði. Í kvörtuninni kom fram að fanginn teldi rennandi vatn í eldhúsi á deildinni þar sem hann væri vistaður ekki nægilega heitt til þess að hægt væri að vaska upp með fullnægjandi hætti og sömuleiðis gerði hann athugasemd við stillingu á sturtum. Athugasemdir fangans vegna þessara stillinga eru ekki tíundaðar nánar. Þá kom fram í kvörtuninni að deildin þar sem fanginn dvelur væri sú eina í fangelsinu sem ekki væri búin uppþvottavél.
Í bréfi sínu til fangans bendir umboðsmaður á að Fangelsismálastofnun sjái um fullnustu refsinga og hafi umsjón með rekstri fangelsa. Þá fari dómsmálaráðherra með yfirstjórn fangelsismála. Almennt sé ekki hægt að kvarta til umboðsmanns fyrr en búið sé að tæma kvörtunar- og kæruleiðir innan stjórnsýslunnar. Að baki þessu skilyrði búi sjónarmið um að stjórnvöld skuli fá tækifæri til að leiðrétta ákvarðanir eða annað í störfum sínum, sem hugsanlega sé ekki í samræmi við lög, áður en leitað sé til aðila utan stjórnkerfis þeirra, eins og umboðsmanns Alþingis, með kvartanir.
Þar sem ekki verði séð að umræddar athugasemdir fangans um aðbúnað á deildinni hafi verið borin undir fangelsismálayfirvöld séu skilyrði laga fyrir því kvörtunin verði tekin til frekari athugunar ekki uppfyllt. Kjósi fanginn að leita til Fangelsismálastofnunar og dómsmálaráðuneytisins með athugasemdir sínar og ef hann verði ekki sáttur við afstöðu þeirra geti hann leitað til umboðsmanns aftur.
Loks tekur umboðsmaður Alþingis fram að embættið fari með svokallað OPCAT-eftirlit sem felist í reglubundnum heimsóknum á staði þar sem einstaklingar séu eða kunni að vera sviptir frelsi sínu. Við eftirlitið verði höfð hliðsjón af þeim athugasemdum sem komið sé á framfæri í kvörtun fangans.
