Hópur fólks sem vinnur að kvikmynd um Jónas Hallgrímsson vill að bein hans verði grafin upp, að tekin verði úr þeim sýni og þau send í erfðagreiningu. Gröf Jónasar verður ekki opnuð nema með dómsúrskurði segir þjóðgarðsvörður á Þingvöllum.
Elín Hirst fjölmiðlakona er í hópi fólks sem hefur rannsakað, þróað og skrifað handrit að heimildamynd um ævi Jónasar Hallgrímssonar.
Þegar hún fór að grafreit hans haustið 2024 á Þingvöllum rifjuðust upp fyrir henni sögusagnir um að beinin í reitnum væru hugsanlega ekki Jónasar. Þetta þótti henni miður og vildi eyða óvissunni af virðingu við þjóðskáldið. Beinin höfðu verið grafin upp í Kaupmannahöfn árið 1946, af Matthíasi Þórðarsyni þjóðminjaverði, og flutt til Íslands.
„Ef þú lest skýrslu Matthíasar þá sér maður að hann kemst nákvæmlega að þeim stað þar sem Jónas var jarðsettur og ég er ekki í vafa um að þetta eru beinin hans Jónasar,“ segir Elín.
Ekki mikið rask að grafa upp beinin
Einar Á. E. Sæmundsen þjóðgarðsvörður á Þingvöllum segir að ekki sé mikið rask að grafa upp bein Jónasar. Reiturinn standi upp úr jörðinni og kista hans hvíli í einskonar steyptri hvelfingu.
„En við munum ekki aðhafast hér nema að undangengnum dómsúrskurði. Og þá mun Þingvallarnefnd taka afstöðu til þess. Ef sá dómsúrskurður fellur þeim í hag þá verður mögulega hægt að taka þetta mál áfram,“ segir Einar.
Gæti verið neikvætt fyrir arfleifð Jónasar
Hallgrímur Óskarsson, skyldmenni Jónasar, vill ekki að gröfin sé opnuð.
„Vegna þess að við gætum lent í því að vera með niðurstöðu sem er ekki óyggjandi og hvað á þá að gera, þannig að við gætum verið með stöðu eftir svona uppgröft sem gerir ekkert nema hugsanlega eitthvað neikvætt fyrir arfleifð Jónasar,“ segir Hallgrímur.
