Ása Guðbjörg Ellerup, fyrrverandi eiginkona raðmorðingjans Rex Heuermann, og tvö börn þeirra eru enn búsett á heimili fjölskyldunnar á Long Island þar sem hann framdi mörg þeirra morða sem hann hefur verið ákærður fyrir.
Í frétt New York Post segir lögmaður fjölskyldunnar, Robert Macedonio, að fjölskyldan geti hvorki selt húsið né tryggt sér lífsviðurværi þrátt fyrir að hafa fengið háa greiðslu fyrir þátttöku í heimildarþáttaröð NBC Peacock um málið.
Að hans sögn eru Ása og börn þeirra í miklum fjárhagsvanda og glíma þar að auki við félagslega einangrun.
„Ef eitthvað er, þá hefur þetta kostað þau peninga,“ segir Macedonio í viðtali við miðilinn.
„Þau eru í raun óvinnuhæf á þessum tímapunkti. Hver ætlar að ráða þau? Þau eru í fjárhagslegum vanda því enginn ræður þau í vinnu og engar tekjur eru til staðar.“
Hafa ekki efni á að fara
Bent er á það í umfjölluninni að fjölskyldan hafi fengið umtalsverða greiðslu fyrir þátttöku í fjögurra þátta heimildarþáttaröð Peacock, The Gilgo Beach Killer: House of Secrets, en samkvæmt lögmanninum hefur sú upphæð ekki dugað til að leysa úr vandanum.
Húsið er bundið skattaveðum, sem þýðir að skattyfirvöld eiga forgang að söluandvirði þess og því myndi lítið, ef eitthvað, standa eftir fyrir fjölskylduna við sölu.
„Þau hafa einfaldlega ekki efni á að fara. Það er hvergi að fara. Þau eru föst í þessu húsi, eins hræðilegt og það kann að vera,“ segir Macedonio.
Hann segir auk þess að líf Ásu og barna hennar einkennist af stöðugu áreiti og málið hafi haft djúpstæð áhrif á líf þeirra.
„Þau hafa ekkert félagslíf,“ segir hann. „Þau eru nánast alltaf saman. Ef þau fara út í búð er bent á þau. Fólk gengur stöðugt framhjá húsinu – þetta er eins og ferðamannastaður, fólk tekur myndir og bendir.“
Töldu að um rangan mann væri að ræða
Rex hefur játað á sig átta morð og verður endanlegur dómur í málinu kveðinn upp í júní næstkomandi. Rex á yfir höfði sér lífstíðarfangelsi án möguleika á reynslulausn. Macedonio segir að handtakan á sínum tíma hafi komið Ásu og börnum þeirra hjóna í opna skjöldu.
„Allt lífið sem þau töldu sig hafa lifað í um þrjá áratugi reyndist ekki vera eins og þau héldu,“ segir hann. „Þau voru í algjörri afneitun. Þau töldu þetta samsæri, að um rangan mann væri að ræða. Þetta var ekki maðurinn sem þau töldu sig þekkja.“
Hann segir að það hafi tekið tíma fyrir fjölskylduna að sætta sig við stöðuna. „Það hefur verið ferli fyrir þau að komast að þeirri niðurstöðu að Rex gerði þetta.“
Telur að Ása muni jafna sig
Rex var upphaflega ákærður fyrir þrjú morð, en síðar fyrir alls sjö morð sem framin voru á árunum 1993 til 2010. Fyrr í þessum mánuði játaði hann að hafa myrt fjórar konur sem oft eru nefndar „Gilgo-fjórmenningarnir“, auk hinna þriggja fyrrnefndu. Þá hefur hann einnig játað morð á konu sem áður hafði ekki verið tengd við hann áður.
Að sögn lögmannsins bíður fjölskyldan nú dómsuppkvaðningar sem fyrirhuguð er 17. júní. Hann segir að Ása vilji beina sjónum frekar að fórnarlömbunum en sjálfri sér. „Hún vill halda áfram og vonast til að lífið komist aftur í eðlilegt horf,“ segir Macedonio.
Aðspurður hvort það sé raunhæft svarar hann: „Já, einhvern tíma. Fólk jafnar sig á öllu. Hún mun gera það.“
