Stjórnvöld hafa hert taumhald í hagstjórn með viðeigandi hætti til að bregðast við aukinni innlendri eftirspurn. Þrátt fyrir það hafa launahækkanir verið töluverðar, verðbólga haldist mikil og verðbólguvæntingar háar. Þá hefur aukin alþjóðleg óvissa vegna átaka í Mið-Austurlöndum aukið hættu á að hagvöxtur verði minni en ella og að verðbólga verði meiri.
Þetta er meðal þess sem fram kemur í árlegri úttekt sendinefndar Alþjóðagjaldeyrissjóðsins, sem kynnt var á fundi í Safnahúsinu í morgun.
Sendinefnd Alþjóðagjaldeyrissjóðsins, undir forystu Metodij Hadzi-Vaskov, átti fundi í maí og byrjun júní með Kristrúnu Frostadóttur forsætisráðherra, Ásgeiri Jónssyni seðlabankastjóra, Daða Má Kristóferssyni fjármálaráðherra og öðrum fulltrúum hins opinbera og einkageirans í tengslum við árlega úttekt sjóðsins á íslensku efnahagslífi.
Verðbólgumarkmið á að nást í upphafi árs 2028
Sendinefndin varar við minnkandi hagvexti og vaxandi verðbólgu. Hægt hefur á efnahagsumsvifum á undanförnum árum en verðbólguþrýstingur hefur haldist mikill. Nefndin býst þó við efnahagsbata, studdum af viðsnúningi í utanríkisviðskiptum, en gert er ráð fyrir að verðbólga aukist vegna stríðsins í Mið-Austurlöndum.
Spáð er hægri aukningu hagvaxtar og að hann verði 1,8% árið 2026 og 2,1% árið 2027. Efnahagsumsvif eru studd af viðsnúningi í útflutningi og batnandi fjármálaskilyrðum. Talið er að meðalverðbólga verði áfram mikil eða 5,2% árið 2026 og 3,2% árið 2027, áður en hún nálgast markmið í upphafi árs 2028.
Hagvöxtur til meðallangs tíma styðst við aukna framleiðni sem stafar af áframhaldandi fjölbreytni í útflutningsgreinum, m.a. í fiskeldi, líftækni, endurnýjanlegri orku og stafrænum innviðum, að því gefnu að áfram verði unnið að því að efla samkeppnishæfni, draga úr skorti á sérhæfðu vinnuafli og styðja nýsköpun.
Meginverkefni hagstjórnarinnar að mati sendinefndar Alþjóðagjaldeyrissjóðsins eru að koma verðbólgu niður í 2,5% markmið og auka viðnámsþrótt gegn áföllum með því að auka svigrúm í ríkisfjármálum og halda áfram kerfislegum umbótum.
