„Ég er alvarlega að hugsa um að frelsissvipta einhvern og ræna,“ heyrist í upptöku úr síma Andra Más Mortensen Birgissonar, sem er einn sakborninga í Reykholtsmálinu svokallaða. Sex Íslendingar, fimm karlar og ein kona, eru ákærð fyrir að halda manni föngnum á heimili sínu í Reykholti í Bláskógabyggð og beita hann harkalegu ofbeldi til þess að hafa af honum fé í apríl 2024.
Margra klukkustunda langar upptökur voru spilaðar við aðalmeðferð sem hófst í Héraðsdómi Suðurlands í morgun. Sími Andra Más tók upp öll samtöl og hljóð um leið og reynt var að hringja úr símanum – hvort sem símtölunum var svarað eða ekki.
Fyrstu upptökurnar voru gerðar dagana áður en en meint frelsissvipting átti sér stað. Þar má heyra Andra Má tala við tengdaföður sinn, sem er einnig sakborningur í málinu, á þriðjudegi. Hann ræðir við hann um að innheimta ógreidda leigu frá brotaþola fyrir hann.
„Engar áhyggjur, ég græja þennan araba,“ var á meðal þess sem hann sagði í samtali við tendaföður sinn, og sagðist myndu heimsækja brotaþola.
Andri heyrist svo óska eftir frekari upplýsingum um brotaþola frá tengdaföður sínum í öðru samtali.
„Hvað segiru, þessi arabadjöfull sem þú ert að tala um? Er hann er búinn að vinna um þrjú eða fjögur?“ spurði hann meðal annars í upptökunni. Hann virðist svo hafa farið heim til brotaþola.
Þaðan virðist hann svo hafa hringt í unnustu sína, sem er einnig sakborningur í málinu, og sagt henni að hún þyrfti að fá tengdaföðurinn til að segja brotaþola hvað hann skuldaði honum og hvernig hann ætti að sýna fram á það. Upphæðin var sögð í kringum 500 þúsund krónur.
„Ég svífst einskis, mér er skítsama“
Nokkru síðar var spiluð upptaka af símtali Andra við mann sem er ekki ákærður í málinu þar sem hann talaði um að þurfa 250 þúsund til að greiða skuld hjá tryggingafélagi sem komin væri í innheimtu.
Hann sagðist vilja að maðurinn myndi greiða honum pening sem hann átti inni hjá honum því annars væri unnusta hans á leið í gjaldþrot.
„Ég er alvarlega að hugsa um að frelsissvipta einhvern og ræna, bara finna einhvern til að frelsissvipta og ræna. Vera bara skítsama, bara óheppinn þú ef þú átt pening. Mér þykir vænna um eigið líf en þitt, ég er bara að hugsa um mig. Þetta er konan mín sko, ég svífst einskis. Mér er skítsama.“
Í samtali við tengdaföður sinn föstudaginn 19. apríl sagðist hann svo ætla að fá tvo menn með sér til að innheimta skuldina frá brotaþola. Hann sagðist ætla skipuleggja það vel til þess að fá peninginn loksins.
„Ég er ekki að fara neitt of gróft, trúðu mér. Ég lofaði honum að við myndum koma aftur. Þetta er útlendingur, ég þarf bara að gefa honum smá hræðslu og ótta. Ég ætla að sækja hann og fara með á Selfoss, og hafa tvo vini mína með,“ heyrist Andri Már segja á upptökunni og heldur áfram að lýsa áformum sínum.
„Bestu skiptin eru auðvitað án ofbeldis en þú þarft að sýna yfirvegun,“ segir hann. „Maður þarf að passa sig á þessum útlendingum, þess vegna er ég að taka strák með mér sem þekkir þetta – reynslubolta.“
„Því miður þá gengur ekki alltaf að vera góður“
Andri Már segir tengdaföður sínum að hann ætli, ásamt vinum sínum, að sækja brotaþola á svörtum Range Rover. Hann spyr tengdaföðurinn hvort hann geti ekki lánað þeim bíl – því að Range Rover jeppinn veki athygli lögreglunnar á Selfossi.
Vinnuveitandi brotaþola muni ekkert kippa sér upp við að hann yrði sóttur af þremur mönnum.
„Í versta falli lætur þú vita í sveitinni að þetta hafi verið tengdasonur þinn. Maðurinn hafi skuldað þér pening og þú þurft þá greidda,“ segir Andri Már við tengdaföður sinn.
„Því miður þá gengur ekki alltaf að vera góður, nú ætla ég að vera svolítið vondur fyrir þína hönd.“
Óttaðist að maðurinn myndi leita til lögreglu
Í símtali milli Andra Más og unnustu hans síðar um nóttina segir hann að þeir hafi beitt brotaþola miklu ofbeldi. „Við erum búnir að berja hann á fullu. Ég er búinn að gera rosa mikið því ég ætlaðist til þess að hann myndi borga. Ef ég yfirgef hann svona er ég hræddur um að hann fari í lögguna og ég tek ekki sénsinn. Ég er búinn að komast inn á fullt af reikningum hjá honum en þetta er fokking erfitt,“ heyrist í Andra Má.
Svo virðist verða talsvert uppnám á heimili brotaþola og Andri Már leggur það til í símtali við unnustu sína að færa brotaþola á heimili þeirra tveggja. Hann biður hana að undirbúa heimili þeirra fyrir það að hann komi með brotaþola þangað.
„Ef við erum að fara frelsissvipta hann heima skaltu vera búin að undirbúa það, taka allar myndir í burtu. Hann má ekki sjá neitt hvar hann er,“ segir Andri Már. Hann heyrist spyrja annan tveggja manna sem voru með honum á heimili brotaþola hvers vegna það sé heimskulegt að færa brotaþrola og segir hann þá:
„Konunni líður betur með að hafa hann heima, ef maður er að fara frelsisvipta vill maður hafa mat og stjórn og svona, segir hann. Ég hef margoft frelsissvipt,“ segir Andri Már.
„Ef þú hreyfir þig þá drep ég þig“
Þegar brotaþoli var fluttur í bílinn slapp hann frá mönnunum þremur. Í Héraðsdómi var spiluð upptaka þar sem Andri virðist hlaupa á eftir brotaþola og öskra á hann, þar til hann nær honum. Þá heyrist hann hóta brotaþola að sparka í hann ef hann hreyfi sig eða reyni að forða sér.
„Ef þú hreyfir þig þá drep ég þig,“ heyrist meðal annars í upptökunni.
Síðar um nóttina hringir Andri Már svo enn eina ferðina í unnustu sína og segir henni að vinirnir tveir hafi orðið stressaðir og forðað sér. Hann segist hræddur um að sést hafi til hans þegar brotaþoli slapp. Hann sé einn eftir með brotaþola.
„Vertu róleg, þú verður að hugga mig. Ég má ekki vera að grenja fyrir framan hann, segir hann meðal annars. „Þeir sviku mig bara. Þeir voru að drífa sig bara og þeim er sama þó ég fari í tíu ára fangelsi sko.“
„Það er allt úti í blóði, allt elskan mín,“
Andri Már lýsir í samtali við unnustu sína áhyggjum af því að lögreglan komi.
„Þá fer ég í fangelsi. Þá fæ ég ekki að hitta börnin, ekki að hitta þig. Þú verður að finna einhverja leið til að ég sé ekki einn. Þú verður að vekja pabba þinn, annars fer ég í fangelsi.“
Í sömu upptöku heyrist hann skipa brotaþola að fara að sofa aftur og að gera ekki neitt heimskulegt. „Ég leyfi þér að lifa ef þú gerir ekkert heimskulegt,“ heyrist hann segja.
„Ég er ekki stoltur af þessu“
Síðar um morguninn hefur Andri samband við bróður sinn og biður hann um aðstoð. Hann segist hafa verið að bjarga tengdaföður sínum.
„Þú ert sá eini sem ég get treyst á núna,“ segir hann. „Það fór allt til fjandans og þú munt ekki sjá bróður þinn ef allt fer til fjandans,“ segir hann.
Hann biður bróður sinn að sækja unnustuna og koma að aðstoða hann.
„Þetta er ofbeldi og hrottaskapur, ég er ekki stoltur af þessu,“ heyrist hann segja við bróður sinn sem samþykkir að hjálpa honum. Þá heyrist hann þagga aftur niður í brotaþola.
„I will blow your fucking brains out, go to sleep,“ heyrist hann meðal annars segja.
Skömmu síðar heyrist hann segja í öðru símtali, við mann sem er sagður ekki vera hluti af málinu: „Ég er bara í miðri frelsissviptingu sko.“
Því næst fór hann með brotaþola í hraðbanka og reyndi að taka pening út af kortinu hans.
Upptökur úr málinu sem spilaðar eru í Héraðsdómi Suðurlands í dag eru í heildina um þrjár klukkustundir, og standa enn yfir.
