„Þessar framkvæmdir eru heilmikið föndur sem hefur tekið sinn... - MBL.IS

Lagfæringar á brúm bæti öryggi

Flokkurinn sem núna er að störfum við Blöndu er gerður út frá Hvammstanga og er undir verkstjórn Vilhjálms Arnórsson brúarsmiðs. „Þetta er traustur mannskapur; strákar sem kunna vel til verka. Núna eru fjórir til fimm menn við Blöndu, en annars skiptum við hópnum svolítið milli verkefna. Annað gengi er núna í Norðurárdal í Borgarfirði. Svo er fram undan í sumar að lagfæra brú yfir Svartárdal sem er hér nálægt. Mörg verkefni vinnuflokksins nú felast í því að lagfæra brýr með aðgerðum sem miða að því að bæta umferðaröryggi,” segir Vilhjálmur, sem á að baki langan feril við brúarsmíði.

„Við Blöndu byrjuðum við í október og höfum tekið þetta í nokkrum lotum. Núna sér þó orðið fyrir endann á verkefninu, sem ætti að ljúka eftir tvær vikur eða svo. Steypuviðgerðir voru stór hluti af þessu. Einnig verkuðum við upp söðlana í turn brúarinnar sem vírar hennar hvíla í. Þar var allt menjað, vatnsvarið og kíttað í bak og fyrir. Núna held ég að segja megi að ástand brúarinnar sé orðið býsna gott og ekkert bendir til annars en að hún dugi í einhverja áratugi enn,“ tilgreinir Vilhjálmur.

Að mörgu er að hyggja, segir Júlíus Rafnsson brúarsmiður. mbl.is/Sigurður Bogi

Mikil umferð yfir brúna

Umferð yfir Blöndubrúna er mikil. Í fyrsta lagi er hún tenging innansveitar í Blöndudal og nærliggjandi byggðum. Yfir sumartímann og fram á haust bætist svo við umferð bíla sem fara um Kjalveg. Leið margra, sem til dæmis koma að norðan, er þá að beygja af hringveginum í Langadal til suðurs, þar sem ekið er austanvert við fljótið. Svo er farið yfir brúna og þá beygt til vinstri og þar fram Blöndudal. Þegar kemur þar upp á brúnir tekur Kjalvegurinn við, alls 170 kílómetra leið yfir hálendið suður að Gullfossi og í Bláskógabyggð.