Mótmæli hafa verið áberandi á Feneyjatvíæringnum í myndlist sem hófst um helgina. Þetta er í fyrsta skipti sem Rússland tekur þátt frá því að allsherjarinnrás í Úkraínu hófst árið 2022. Þá hafa margir gagnrýnt viðveru Ísraels á hátíðinni.
„Það er augljóst að alls staðar þar sem þjóðir ætla að keppa þar er mikil spenna um þessar mundir og alþjóðastjórmálin lita það,“ segir Kristján Guðjónsson, útvarpsmaður á Rás 1, sem sótti hátíðina um helgina.
Kristján segir að hátíðin sé stundum kölluð ólympíuleikar myndlistarinnar. Alla jafna er einn þjóðarskáli valinn bestur á hátíðinni. Verðlaunin verða þó ekki með hefðbundnum hætti að þessu sinni. Alþjóðleg dómnefnd sagði af sér vegna þess að hún vildi ekki taka til greina þjóðarskála ríkja þar sem þjóðarleiðtogar hafa verið sakaðir um glæpi gegn mannkyni af alþjóðlega sakamáladómstólnum.
„Þetta augljóslega litar allt sem er í gangi þarna. Þetta er svona mál málanna þetta árið,“ segir Kristján.
Ákvörðun um að heimila þátttöku Rússlands hefur verið mjög umdeild og Logi Einarsson menningarráðherra studdi ákall um endurskoðun hennar. Evrópusambandið dró til baka fjárstuðning og mótmælendur hafa reynt að meina fólki að komast að rússneska skálanum.
Meðal mótmælenda hafa verið íslensk-rússneska gjörningasveitin Pussy Riot. „Það voru líka lítil mótmæli, einstaklingar sem skrifuðu slagorð á fötin sín, eða voru með borða,“ segir Kristján. Hann telur að flestir sem hafi tekið þátt í hátíðinni hafi orðið varir við einhver mótmæli, sem hafi verið nánast daglega.
Kristján lýsir því að andrúmsloftið hafi verið þrungið spennu en lögregla hefur haft mikla viðveru á hátíðinni. Hann telur þó enga hættu stafa af mótmælunum. „Ég held þetta séu fyrst og fremst og algjörlega táknræn mótmæli.“
