Forsætisráðherra leggur til að upplýsingaskylda opinberra starfsmanna vegi þyngra en þagnarskylda í rannsókn óháðrar nefndar á aðstæðum barna á vistheimilum. Kristrún Frostadóttir boðaði stofnun óháðrar rannsóknarnefndar í kjölfar umfjöllunar um vistheimilið Bakkakot.
Áform um lagasetningu þess efnis voru birt í samráðsgátt stjórnvalda í dag. Menn sem vistaðir voru á Bakkakoti í æsku sögðu í fréttaskýringaþættinum Kveik í febrúar að þeir hefðu verið beittir margvíslegu ofbeldi þar.
Síðan þá hafa fleiri stigið fram með svipaða sögu að segja af öðrum vistheimilum.
Áform forsætisráðherra miðast að því að aðstæður barna, sem vistuð voru fyrir atbeina hins opinbera á einkaheimilum, verði skoðaðar líkt og aðbúnaður barna á vist- og meðferðarheimilum hefur áður verið rannsakaður.
Fyrirhugað frumvarp mun kveða á um skipan rannsóknarnefndar, skýrar valdheimildir og reglur um málsmeðferð.
Meðal þeirra er heimild til að taka skýrslu af fyrrverandi og núverandi opinberum starfsmönnum, starfsmönnum barnaverndar og heilbrigðisstarfsfólki við rannsókn. Þar að auki er lagt til að þeir starfsmenn verði bundnir lagaskyldu til að láta í té upplýsingar, þrátt fyrir ákvæði laga um þagnarskyldu.
Lögmaður Bakkakotsmanna vildi skýrar heimildir
Bjarki Heiðar Bjarnason, lögmaður Bakkakotsmanna, fundaði með Kristrúnu í síðustu viku. Þar voru honum kynnt frumvarpsdrögin. Hann sagði að honum litist ágætlega á þau en að ýmislegt þyrfti að laga.
Þar nefndi hann að nefndin þyrfti skýrar heimildir, meðal annars til að kalla eftir gögnum frá lögreglu, heilsufarslegum upplýsingum og áverkavottorðum, til að unnt væri að sýna fram á það tjón sem umbjóðendur hans hefðu orðið fyrir.
Hann sagði umfjöllun hafa verið mönnunum erfið og að einhverjir hefðu reynt að stytta sér aldur.
