Gert er ráð fyrir að niðurstaða úr atkvæðagreiðslu flugvirkja muni liggja fyrir þann 1. desember. Þetta kemur fram í tilkynningu frá Icelandair.
Flugvirkjar hófu verkfallsaðgerðir í september en þeim var fljótlega aflýst um það leyti sem ríkisstjórnin samþykkti frumvarp Eyjólfs Ármannssonar innviðaráðherra um lög um bann við verkfallsaðgerðunum.
Deilu flugvirkja við flugfélagið var vísað til ríkissáttasemjara í febrúar og gengu viðræður lengi erfiðlega. Flugvirkjar skoruðu í sumar á Icelandair að hætta við áform um kaup á hluta af starfsemi Play á Möltu af ótta við að störf yrðu flutt úr landi. Icelandair gekk síðar frá kaupum á 49 prósenta hlut í Fly Play Europe Holdco úr þrotabúi Play en umrætt félag er með maltneskt flugrekstrarleyfi.
Samningar Icelandair við Félag íslenskra atvinnuflugmanna og Flugfreyjufélag Íslands eru enn lausir og hafa verið það síðan haustið 2025. Félag íslenskra atvinnuflugmanna hefur samþykkt ótímabundnar verkfallsaðgerðir sem munu hefjast 20. nóvember næstkomandi en það takmarkast við leiguflug á vegum Icelandair.
Sökuðu stéttarfélögin um að draga upp villandi mynd
Síðasta föstudag lýstu formenn Flugvirkjafélags Íslands, Félags íslenskra atvinnuflugmanna og Flugfreyjufélags Íslands yfir áhyggjum af „þeirri stefnu sem Icelandair virðist vera að taka og áhrifum hennar á starfsfólk, íslenskan vinnumarkað og framtíð íslenskrar flugstarfsemi“ í opnu bréfi til lífeyrissjóða sem fara með eignarhluti í Icelandair. Í bréfinu var meðal annars vísað til hægagangs í kjaraviðræðum, stofnunar dótturfélags í Litáen og kaupa á hlut í áðurnefndu félagi á Möltu.
Forstjóri og stjórnarformaður Icelandair brugðust við þessu með því að saka stéttarfélögin um að draga upp villandi og ósanngjarna mynd af flugfélaginu. Forsvarsmenn félagsins hefðu skýran samningsvilja en samningar yrðu að vera ábyrgir.
Fréttin hefur verið uppfærð.