Guðmundur Björgvin Helgason ríkisendurskoðandi íhugar að leita réttar síns fyrir dómstólum vegna málsmeðferðar forsætisnefndar á eineltisásökunum starfsfólks á hendur honum. Guðmundur Björgvin segir að upp sé komin „mjög alvarleg staða milli forsætisnefndar og ríkisendurskoðanda, sem einmitt varðar grundvallaratriði eins og traust, trúnað, hlutlausa málsmeðferð og vandaða stjórnsýslu.“
Þetta er meðal þess sem kemur fram í bréfi sem ríkisendurskoðandi sendi þingmönnum fyrir helgi og fréttastofa hefur undir höndum. Starfsfólk Ríkisendurskoðunar hefur lýst ófremdarástandi innan stofnunarinnar og kvartað undan úrræðaleysi. Í desember samþykkti forsætisnefnd Alþingis verklagsreglur um meðferð tilkynninga um einelti og áreitni af hálfu ríkisendurskoðanda.
Þá fól forsætisnefnd óháðum aðila að gera úttekt á stöðu mannauðsmála innan stofnunarinnar. Forsætisnefnd fékk greinargerð vegna úttektarinnar undir lok apríl og ríkisendurskoðandi skilaði forsætisnefnd umsögn vegna greinargerðarinnar 1. maí.
„Skilningur ríkisendurskoðanda er að hann hafi ekki sýnt af sér EKKO-háttsemi samkvæmt fyrirliggjandi greinargerð en bæði málsmeðferð og efnistök hennar fela að hans mati í sér margföld brot gagnvart ríkisendurskoðanda, jafnt af hálfu þjónustuaðilans, sem og forseta Alþingis, skrifstofustjóra og forsætisnefndar,“ segir í bréfi Guðmundar Björgvins til þingmanna.
„Skoðar ríkisendurskoðandi nú m.a. að leita réttar síns fyrir dómstólum vegna þessara brota á stjórnsýslulögum og meiðyrðalöggjöfinni. Enn fremur hyggst ríkisendurskoðandi senda kvörtun til siðanefndar sálfræðingafélasins vegna málsmeðferðar umrædds þjónustuaðila.“
Alþingi setji lög um meðferð EKKO-tilkynninga um æðstu stjórnendur.
Guðmundur Björgvin segir að verklagsreglur sem forsætisnefnd samþykkti í desember um ríkisendurskoðanda einan gangi ekki upp. Hann segir þá leið sem forsætisnefnd kaus að fara framkalla verulega orðsporsáhættu fyrir Alþingi og stjórnsýslu þess.
„Sköpuð hefur verið að líkindum fordæmalaus staða í samskiptum forsætisnefndar og ríkisendurskoðanda. Hvetur ríkisendurskoðandi til þess að sanngirni, heiðarleiki og góðir starfshættir verði hafðir að leiðarljósi við úrlausn þessara mála.“
Guðmundur Björgvin óskar eftir því að Alþingi setji lög um um meðferðir tilkynninga um mögulega EKKO-háttsemi allra æðstu stjórnenda Alþingis og eftirlitsstofnana þess, þar með talið forseta Alþingis og skrifstofustjóra, umboðsmanns Alþingis og ríkisendurskoðanda. Hann segir lög ekki gera fyrir tilhlýðilegum farvegi fyrir slíkar tilkynningar.
