Laxaseiði sluppu úr laxeldisstöð í Kelduhverfi í Norðurþingi í síðustu viku. Ekki liggur fyrir hversu mörg seiði sluppu úr kerinu en rekstrarleyfishafinn á staðnum, Kaldakvísl ehf., náði að fanga 50 seiði sem höfðu sloppið. Að sögn Karls Steinars Óskarssonar, deildarstjóra fiskeldis hjá Matvælastofnun, er rannsókn á strokinu í fullum gangi en nákvæmur fjöldi seiðanna sem sluppu kemur ekki í ljós fyrr en talið er upp úr kerinu.
Búnaður bilaði þannig að laxarnir sluppu úr kerinu í settjörn. Þar er seinni vörn fyrirtækisins gegn stroki og telja stjórnendur fyrirtækisins hverfandi líkur á að seiðin hafi komist út í sjó. Fyrirtækið virkjaði strax viðbragðsáætlun til að koma í veg fyrir frekara strok.
Málið litið alvarlegum augum
Meðalþyngd seiðanna var rúm 92 grömm og voru því þau að öllum líkindum orðin sjógönguhæf. Laxaseiði verða yfirleitt sjógönguhæf þegar þau eru um 20-30 grömm og ef þau komast alla leið til sjávar gætu þau haft áhrif á villta laxastofna. Karl Steinar bendir þó á að langur vegur sé frá því að 92 gramma seiði verði fullvaxið og kynþroska - og geti þar með valdið verulegum skaða á villtum stofnum. Um 0,1 prósent seiða ná alla þá leið.
Hann segir málið engu að síður litið alvarlegum augum og að þetta sé orðið alltof algengt. Þegar seiði sleppa úr eldi er það annaðhvort vegna bilunar í búnaði eða mannlegra mistaka. Þá sé algengur misskilningur að seiði úr landeldi geti ekki ratað út í sjó.
Áætlað er að framleiða um 200 þúsund tonn af laxi í landeldi hér á landi í ár og til þess þurfi gríðarlegt magn seiða. Með auknum umsvifum og vaxandi framleiðslu eykst einnig hættan á stroki samhliða.
