160 voru grunaðir um vændiskaup á tímabilinu 2020 til apríl á þessu ári, samkvæmt svörum ríkislögreglustjóra við fyrirspurn fréttastofu. Þar af komu upp 44 mál í fyrra, fleiri en árin á undan.
„Þetta er í samræmi við það sem við erum að sjá, þessum málum fer fjölgandi,“ segir Hildur Sunna Pálmadóttir, sviðsstjóri ákærusviðs hjá lögreglunni á höfuðborgarsvæðinu.
Af málunum 160 hafa 57 verið sektaðir og 13 mál send til ákærusviðs, þar sem ákvörðun er síðan tekin um hvort ákæra er gefin út. Vert er að taka fram að í einhverjum málanna stendur rannsókn enn yfir og því óvíst hver lyktir þeirra verða.
Þrátt fyrir að fleiri mál komi upp en leiði til sekta eða hugsanlegrar ákæru segir Hildur Sunna þetta ekki þýða að meirihluti málanna dagi uppi.
„Það fer eftir því hvernig málin koma til okkar hvernig þau enda. Oft er til dæmis tilkynntur grunur um vændi sem er svo ekki en flest málin koma upp við eftirlit lögreglu og eru þá byggð sterkum sönnunargögnum sem gerir það að verkum að þau eru líklegri til að fara áfram í sektarmeðferð eða ákærumeðferð.“
Auknar rannsóknir og fleiri grunaðir
Í fyrra komu talsvert fleiri mál upp þar sem fólk var talið hafa haft atvinnu eða viðurværi af vændi annarra en árin á undan. Árið 2025 voru ellefu grunaðir um slík brot en árin fimm á undan voru þeir samtals sex.
Hildi Sunnu þykir líkleg skýring á þessu vera aukinn styrkur deildarinnar sem rannsakar mansal og vændi hjá lögreglunni á höfuðborgarsvæðinu.
„Við höfum því getað farið í fleiri verkefni, sinnt þeim betur og líka [farið í] frumkvæðismál. Í slíkum tilfellum getur komið upp að við finnum þá jafnframt gerandann að baki vændinu, þann sem er að gera fólkið út.“
