Bjarni Már Magnússon, hafréttarsérfræðingur og lögmaður, segir að innan landhelgi Íslands njóti ríkið fullveldis með þeirri undantekningu að þurfa að heimila friðsamlega ferð skipa.
Bjarni segir að miðað við lýsingar í fjölmiðlum sé ljóst að Bandero hafi ekki verið í friðsamlegum erindagjörðum.
„Og þá er hægt að grípa til ákveðinna aðgerða, vísa úr landhelginni, en við þetta bætist að þarna eru ákveðnir tilburðir, eins og því er lýst í fjölmiðlum, að ógna þessu skipi og áhafnarmeðlimum.“
Fræðilega séð geti þetta orðið að alþjóðlegu deilumáli
Slíka tilburði segir Bjarni kalla á ýmis ákvæði úr bæði innlendri löggjöf um siglingar og sömuleiðis ákvæði í almennum hegningarlögum.
Paul Watson hefur sagt að með aðgerðum Landhelgisgæslunnar hafi friðsamleg afskipti samtakanna af ólöglegum hvalveiðum orðið að alþjóðlegu deilumáli. Bjarni segir að fræðilega séð geti þetta orðið að deilumáli.
„Það er alltaf hægt að kokka upp einhverjar röksemdarfærslur um að þarna sé verið að brjóta á rétti til mótmæla og svo yrði fundið að einhverjum einstaka atriðum í aðgerðum Landhelgisgæslunnar. En svo er spurning hvort röksemdarfærslurnar haldi vatni.“
