Jared Kushner, tengdasonur Bandaríkjaforseta og erindreki Bandaríkjastjórnar í Mið-Austurlöndum, ræðir í dag við forsætisráðherra Ísraels um friðaráætlun á Gaza. Kushner fundaði með leiðtoga Hamas í gær um áætlunina, sem stjórnvöld í Ísrael hafa þegar hafnað.
Fundur Kushners og Benjamíns Netanjahú, forsætisráðherra Ísraels, hófst fyrir hádegi.
Á fundinum eru einnig fulltrúar friðarráðs Trumps, sem hefur umsjón með friðaráætlun Bandaríkjaforseta fyrir Gaza, búlgarski stjórnmálamaðurinn Nickolay Mladenov og Tony Blair, fyrrverandi forsætisráðherra Bretlands.
Friðarráðið náði samkomulagi við Hamas-samtökin og aðra vopnaða hópa á Gaza um að þeir skyldu afvopnast í lok júlí. Það var hluti af fimmtán punkta friðarsamkomulagi sem friðarráðið setti saman. Afvopnunin væri þó háð því að Ísraelar myndu draga herlið sitt frá Gaza og binda enda á allar árásir.
Netanjahú hafnaði friðarsamkomulaginu í síðustu viku og sagði Ísrael ekki draga herlið sitt frá Gaza fyrr en Hamas hefði afvopnast að fullu. Fulltrúar átta múslimaþjóða sendu frá sér yfirlýsingu í gær þar sem þeir fordæmdu þá ákvörðun.
Embættismaður, sem ísraelski fjölmiðillinn The Times of Israel ræddi við, gerði lítið úr ágreiningi við Bandaríkin um framgang áætlunarinnar. Hann sagði að frekar en að stefna að því að Ísraelar samþykki hana væri áherslan á fundinum í dag að halda áfram með það sem hægt væri.
Ólíklegt að Netanjahú samþykki
Kusnher fundaði með Khalil al-Hayya, nýjum leiðtoga Hamas, í Egyptalandi í gær. AFP-fréttaveitan hefur eftir heimildarmanni að Kusnher hafi krafist þess að Hamas staðfesti að samtökin ætli að leggja niður vopn og heiti því að reyna ekki að stjórna Gaza í framtíðinni.
Í yfirlýsingu að fundi loknum hvöttu Hamas samningamenn og friðarráðið til að þrýsta á Ísrael að samþykkja áframhaldandi skref.
Ólíklegt þykir að Netanjahú fallist á málamiðlanir þar sem stutt er í þingkosningar í landinu, flokkabandalag hans reynir að halda völdum en innan þess eru ráðherrar sem vilja taka harðari afstöðu gagnvart Gaza.
