Eigendur einbýlishúss í Breiðholti hafa kært þá ákvörðun byggingarfulltrúa Reykjavíkurborgar að þeir skuli færa húsið til fyrra horfs en innréttaðar hafa verið sjö íbúðir í húsinu. Ráðist hafði verið í framkvæmdirnar á sínum tíma án þess að sækja fyrst um byggingarleyfi. Nefndin samþykkti að breytingarnar á húsinu fái að standa þar til úrskurðað hefur verið um kæruna.
Húsið er um 220 fermetrar en samkvæmt fasteignaskrá er því skipt í kjallaraíbúð, íbúð á hæð og bílskúr.
Sótt var um leyfi fyrir framkvæmdunum til byggingarfulltrúa í nóvember 2025 en þá hafði þegar verið grafið út úr kjallara á húsinu, settir gluggar og göngudyr og innréttaðar sjö íbúðir.
Umsókninni var á endanum hafnað með vísan til þess að fjölgun íbúða í húsinu samræmdist ekki hverfisskipulagi. Í mars voru eigendur upplýstir um að byggingarfulltrúi krefðist þess að húsið yrði fært til fyrra horfs og til samræmis við samþykkta aðaluppdrætti. Engin svör bárust fyrst um sinn og var loks eigendum tilkynnt að til stæði að leggja á 25.000 króna dagsektir fyrir hvern dag sem það drægist að verða við kröfunni um að færa húsið aftur til fyrra horfs.
Með kærunni krefjast eigendurnir þess að ákvörðun byggingarfulltrúa verði felld úr gildi eða þá að ákvörðun sem tekin var í kjölfarið um að veita 60 daga frest til þess að koma húsinu í fyrra ástand verði felld úr gildi.
Ekki nýtilkomið
Í kærunni er bent á að þetta ástand hússins sé ekki nýtilkomið. Það hafi verið svona frá því að annar núverandi eiganda hafi eignast það árið 1998 og samkvæmt upplýsingum hans hafi húsið verið í þessu ástandi frá því að það var byggt á áttunda áratug síðustu aldar. Núverandi eigendur hafi verið í góðri trú allan þann tíma og hafi beiðni um leyfi fyrir áðurgerðum framkvæmdum verið lögð fram að frumkvæði eigenda. Ákvörðun byggingarfulltrúa um að þeir skuli taka framkvæmdirnar til baka sé haldin formgöllum, á henni séu efnislegir annmarkar og hún hafi í för með sér óhóflega skerðingu á hagsmunum þeirra. Óskað hafi verið eftir samtali við borgina og á fundi sem haldin hafi verið með fulltrúum embættis byggingarfulltrúa hafi verið lýst yfir vilja til að láta teikna upp eignina miðað við hámarks nýtingarhlutfall samkvæmt nýlega samþykktu hverfisskipulagi og að þær tillögur yrðu lagðar fyrir borgina til samþykktar.
Gerðu eigendurnir kröfu til þess að réttaráhrifum ákvöðrunarinnar yrði frestað á meðan kæran er til meðferðar, þ.e.a.s. að þeir þurfi ekki að verða við ákvörðun byggingarfulltrúans áður en úrskurður nefndarinnar um kæruna liggur fyrir. Borgin andmælti kröfum um frestun réttaráhrifa og ítrekaði að umsókn um leyfi fyrir þessum áðurgerðu breytingum á húsinu hafi verið hafnað með vísan til þess að fjölgun íbúða í húsinu væri ekki í samræmi við heimildir í hverfisskipulagi.
Nefndin varð hins vegar við kröfu eigendanna um frestun réttaráhrifa þar sem um væri að ræða ákvörðun sem væri íþyngjandi og beindist aðeins að eigendunum. Það væru heldur ekki knýjandi ástæður sem gerðu það að verkum að varhugavert væri að bíða eftir niðurstöðu.
Íbúðirnar sjö í húsinu fá því að standa óhreyfðar þar til niðurstaða í málinu liggur fyrir.
