Geir Ágústsson skrifar:

Hvað gerist ef meirihluti svarar „já“?

Þessi spurning blasir við á síðu yfirvalda, thjodaratkvaedi.is, og svarið svohljóðandi:

1. Það felur ekki í sér endanlega ákvörðun um inngöngu Íslands í Evrópusambandið.
2. Markmið aðildarviðræðna er að gera aðildarsamning. Það er samningur við aðildarríki Evrópusambandsins um að Ísland gerist aðili að sambandinu.
3. Ef viðræðurnar skila aðildarsamningi hefur ríkisstjórnin boðað að haldin verði önnur þjóðaratkvæðagreiðsla um hvort samþykkja eigi þann samning.
4. Alþingi og utanríkisráðherra þyrftu að samþykkja samninginn.
5. Einnig þyrfti að breyta stjórnarskránni áður en Ísland gæti orðið aðili að Evrópusambandinu. Allar stjórnarskrárbreytingar þarf að samþykkja af tveimur þingum með alþingiskosningum á milli.

Þetta er að sumu leyti rétt en ekki öllu. Atriði 1 er rétt. Atriði 2 er að hluta rétt - það að gera aðildarsamning felur í sér stöðuga og skipulagða aðlögun að regluverki ESB á samningstímanum, eða með orðum ESB:

Á meðan á aðildarviðræðum stendur undirbýr umsóknarríkið innleiðingu laga og staðla Evrópusambandsins, sem sameiginlega eru nefnd acquis(réttarregluverk ESB).

Á meðan á viðræðunum stendur fylgist framkvæmdastjórn Evrópusambandsins með framvindu umsóknarríkisins við þessar umbætur og upplýsir ráð Evrópusambandsins og Evrópuþingið reglulega um stöðuna með skýrslum og öðrum tilkynningum.

**********

During membership negotiations, the candidate country prepares to implement EU laws and standards, also known as the acquis.

Throughout the negotiations, the Commission monitors the candidate's progress on these reforms and keeps the Council and European Parliament informed of this through regular reports and communications.

Atriði 3 er rétt gefið að atriði 2 sé skilið sem aðlögunarferli með stöðugum laga- og stjórnarskrárbreytingum sem ESB fylgist með og vegur og metur sem fullnægjandi eða ekki.

Atriði 4 er rétt en þarna gleymist að öll hin ESB-ríkin þurfa líka að samþykkja samninginn, eða með orðum ESB:

Þegar aðildarviðræðunum er lokið leggur framkvæmdastjórn Evrópusambandsins mat á hvort umsóknarríkið sé tilbúið til að gerast aðildarríki. Telji framkvæmdastjórnin að umsóknarríkið sé reiðubúið er saminn aðildarsamningur. Í honum eru kveðið á um skilmála og skilyrði aðildar ríkisins að Evrópusambandinu.

Aðildarsamningurinn þarf síðan að hljóta samþykki framkvæmdastjórnar Evrópusambandsins, leiðtogaráðs Evrópusambandsins og Evrópuþingsins áður en hann er undirritaður og fullgiltur af öllum aðildarríkjum ESB og umsóknarríkinu.

Umsóknarríkið verður formlega aðildarríki Evrópusambandsins á þeim degi sem tilgreindur er í aðildarsamningnum.

**********

Once the negotiations are complete, the Commission gives its opinion on whether the candidate is ready to become a Member State. If the Commission recommends that the candidate is ready, an accession treaty is prepared. This document details the terms and conditions of the country's EU membership.

The accession treaty must then be approved by the European Commission, the European Council and the European Parliament before being signed and ratified by all EU Member States and the candidate country.

The candidate country officially joins the EU on the date outlined in its accession treaty.

Þetta þýðir að Írar þurfa að vera sáttir við ákvæði um útfærslu á fiskveiðistjórnun, svo dæmi sé tekið.

Atriði 5 er rétt en er hluti af atriði 2: Aðlögun Íslands að regluverki ESB.

Með þessu er ekki þar með sagt að aðild og aðlögun Íslands að ESB sé slæm hugmynd heldur bara það að aðildarviðræður eru um leið aðlögunarviðræður. Þetta stendur svart á hvítu á heimasíðu ESB og fer ekki á milli mála.

Hvað varðar tímabundnar og afmarkaðar undanþágur, aðlögunartímabil og tæknilegar útfærslur á einhverju sem þó fellur að regluverki ESB (t.d. styrkir til bænda eða slíkt) þá er það auðvitað eitthvað sem er samið um.

Af einhverjum óskiljanlegum ástæðum er erfitt að halda þessu til haga í umræðunni en hér með gert.