Jón Magnússon skrifar:

Það er athyglisvert að fylgjast með umræðunni um hina breyttu heimsmynd.  Hún á að felast í því að Bandaríkjamenn leggi sífellt minna upp úr samstarfi við Evrópu og NATO og þeim sé vart treystandi til að standa við milliríkjasamninga.

Þessi umræða er nú aðallega rekin af þeim sem prédika nauðsyn aðildar Íslands að ESB og sveipa um sig kuflum fræðimennsku og tala oft í þessari baráttu af lítilsvirðingu um þá sem ætla að segja nei og velja þá iðulega orðin. Lítið menntað og/eða  gamalt fólk nema hvorutveggja sé.  Aldursfordómar og menntahroki í fyrirrúmi

Ef við skoðum hina breyttu heimsmynd hvað okkur varðar þá skulum við hafa ákveðnar staðreyndir í huga:

1. Bandaríkin(USA) er og hefur verið traustasti vinur Íslands frá því í síðari heimsstyrjöld. Á því hefur engin breyting orðið.
2. Varnar og öryggissamningur við  USA, hefur reynst okkur vel og eina öryggið sem við höfum auk NATO aðildar.
3. USA studdi baráttu okkar fyrir því að verða lýðveldi árið 1944 og varð fyrsta þjóðin sem viðurkenndi lýðveldið.
4. USA hefur aldrei reynt að hafa áhrif á löggjöf okkar eða sthórnmálaumræður í landinu. En ESB sem úðar út endalausum reglum og lögum sem kosta mikið og eru til trafala.
5. USA hefur burði til að verja Ísland og mundu gera það svo lengi sem varnar og öryggissamningur við þá er í gildi. Fullyrða má að engin Evrópuþjóð mundi lyfta litla fingri þó á Ísland yrði ráðist.
6. Hin breytta heimsmyndm sem svo er kölluð er m.a. tilkomin vegna þess að nokkur ESB ríki hafa ekki staðið við þá samninga sem þeir hafa gert við USA í varnarmálum og látið bandaríska skattgreiðendur greiða fyrir varnir Evrópu. USA hefur fyrir löngu fengið nóg, en það er Trump sem rekur málið af meiri hörku en forverar hans sem hafa þó allir kvartað vegna þessa.
7. Í stað þess að reyna að styðja Bandaríkjaforseta við að koma á friði í Úkraínu, hafa sum Evrópuríki ítrekað unnið gegn því.
8. E.t.v. eru breyttar áherslur vegna þess að USA hefur áttað sig á að varnir lýðræðisþjóðanna á norðurslóðum er ófullnægjandi. Það þýðir fyrir okkur meiri möguleika á að vera í þéttara og meira samstarf við USA og það eigum við að gera.
9. Brölt og vilji ESB til að koma á sameiginlegum her og stefna að Sambandsríki Evrópu þó NATO samstarfið sé óbreytt hefur auk heldur aukið á tortryggni.
10. Við höfum átt traustan bandamann í USA sem kemur sér vel í viðsjárverðum heimi. Við eigum að leggja áherslu á að treysta böndin við USA enn meir. Skynsamlegast er að standa utan ESB og geta verið áfangi – millistöð – eða brú á milli ESB og USA.  Möguleikar okkar sem þjóðar eru gríðarlegir í þessu samhengi.

Við viljum hafa gott samstarf við allar þjóðir. Við skulum gera það, en láta okkur sérstaklega annt um þann vin okkar sem hefur staðið með okkur hvort sem var í sjálfstæðisbaráttu, landhelgisbaráttu og til að tryggja varnir og öryggi Íslands án þess að krefjast neins í staðinn eða reyna að skipta sér af íslenskum stjórnmálum eða stjórnskipun landsins.

Segjum nei við ESB en horfum á nýjar víddir og víðtækari til að búa íslensku þjóðinni bestu lífskjör og öryggi í viðsjárverðum heimi.