Pawel Bartoszek, formaður utanríkismálanefndar, fagnar umsögnum stjórnskipunar- og eftirlitsnefndar sem lagt hefur til að breytingar verði gerðar á spurningunni sem lögð verður fyrir landsmenn í komandi þjóðaratkvæðagreiðslu um ESB-viðræður.
„Við höfum nú fengið álit stjórnskipunar- og eftirlitsnefndar, Hagfræðistofnunar, Lagastofnunar, Feneyjarnefndarinnar og fjölda umsagnaraðila á okkar fund,“ segir hann.
„Nú tel ég bara að næsta stig í málinu sé að fara að undirbúa það að rita álit meirihlutans og auðvitað minnihlutans líka,“ segir Pawel.
Með því yrði málið afgreitt úr utanríkismálanefnd og tekið til annarrar umræðu á Alþingi. Lögð hefur verið áhersla á að málið verði klárað á Alþingi fyrir 29. maí svo hægt verði að framkvæma þjóðaratkvæðagreiðsluna þann 29. ágúst.
Vilja breyta spurningunni og einfalda svarmöguleika
Bæði minni og meirihluti stjórnskipunar- og eftirlitsnefndar vilja einfalda þá spurningu sem lögð verður fyrir landsmenn í þjóðaratkvæðagreiðslu í ágúst.
Sú spurning sem meirihluti nefndarinnar leggur til er eftirfarandi:
„Á Ísland að hefja á ný aðildarviðræður við Evrópusambandið?“
Sú spurning er að mati meirihlutans opnari en sú sem lögð er til í upprunalegri þingsályktunartillögu Þorgerðar Katrínar Gunnarsdóttur utanríkisráðherra en þar var spurt hvort halda ætti áfram viðræðum við Evrópusambandið. Þá er einnig lagt til að svarmöguleikar verði einfaldari í já og nei frekar en að þeir feli í sér fullyrðingu líkt og í spurningu utanríkisráðherra.
Minnihluti nefndarinnar lagði einnig til að atkvæðagreiðslunni yrði frestað svo nægur tími gæfist til kynningar á henni. Bæði minni- og meirihluti nefndarinnar telja áskoranir fólgnar í að kynna atkvæðagreiðsluna á sumartíma. Meirihlutinn lagði áherslu á að tryggja yrði aðgang almennings að greinargóðu, aðgengilegu og hlutlausu kynningarefni þar sem jafnvægis væri gætt í umfjöllun.
„Ég held að það hafi verið skynsamlegt hjá stjórnskipunar- og eftirlitsnefnd að bregðast við þessum ábendingum Landskjörstjórnar og leggja til breytta spurningu,“ segir Pawel sem telur þó ekki að breyta verði dagsetningu atkvæðagreiðslunnar.
„Landskjörstjórn telur sér vel fært að framkvæma atkvæðagreiðsluna á þessum tíma, 29. ágúst, og standa fyrir góðri upplýsingaöflun til almennings í aðdraganda hennar,“ segir hann.
Samkvæmt mati stjórnskipunar- og eftirlitsnefndar er talið að kostnaður við framkvæmd þjóðaratkvæðagreiðslunnar geti numið um 600 til 700 milljónum króna. Áður hafði Þorgerður Katrín sagt kostnað geta numið á bilinu 200 til 250 milljónum þegar þjóðaratkvæðagreiðslan var boðuð í mars.
