Eldra fólk leitar síður til lögreglu en aðrir hópar þegar það verður fyrir ofbeldi, sér í lagi þegar gerandi er ættingi eða aðstandandi, segir Eva Lind Vestmann, sem hefur skipulagt fræðslu fyrir eldra fólk á vegum Reykjavíkurborgar.
Dæmi séu um að fólk sem hafi þagað yfir ofbeldi sem það er beitt opni sig við lögreglumenn eða félagsráðgjafa að loknu fræðsluerindi. Fræðslan skipti sköpum því þessi hópur þurfi vettvang og tækifæri til að stíga fram.
„Ég held að hann tilkynni síður til lögreglunnar og lætur vita. Þetta getur verið umönnunaraðilinn þinn sem er kannski að beita þig líkamlegu, andlegu eða fjárhagslegu ofbeldi. Þetta er svolítið falið hjá þessum hópi,“ sagði Eva Lind í Morgunútvarpinu á Rás 2.
„Þessi hópur, þessi kynslóð, hefur verið svolítið að ekki tala um hlutina og ekki verið mikið að tilkynna.“
Á vef Reykjavíkurborgar segir að einn af hverjum sex einstaklingum eldri en 60 ára hafi orðið fyrir einhvers konar ofbeldi. Þetta getur verið líkamlegt, andlegt, kynferðislegt, stafrænt eða fjárhagslegt ofbeldi, eða jafnvel vanræksla.
Símon Geir Geirsson, samfélagslögreglumaður, segir eldra fólk einna helst verða fyrir fjárhagsbrotum og svikum. Hann brýnir fyrir fólki að vera gagnrýnið, til að mynda þegar það fær óumbeðin símtöl þar sem það fær fyrirmæli um að samþykkja eitthvað rafrænt.
„Við erum að fræða fólk, eins og við erum að fræða börnin, við erum að valdefla. Fólk veit að það er að verða fyrir ofbeldi – en hvað á ég að gera? Þá erum við að koma með lausnir, eins og að tala við félagsráðgjafa og tala við okkur, því við erum bara að hjálpa fólki. Það er númer eitt, tvö og þrjú.“
Upplýsingar um aðstoð fyrir brotaþola má finna á vef Reykjavíkurborgar með því að smella hér.
