Áform stjórnvalda um að laun dómara og fleiri hópa hækki um 3,5 prósent í ár falla í grýttan jarðveg hjá Dómarafélagi Íslands. Sú hækkun er hluti af lagafrumvarpi sem kveður á um minni launahækkanir en hjá þeim hópum sem laun dómara, saksóknara og þingmanna miðast við.
Dómarafélagið skilaði inn umsögn um lagafrumvarpið. Þar segir að þetta sé í fimmta sinn á sjö árum sem stjórnvöld grípi inn í launahækkanir dómara. Þannig sé búið að ákvarða þeim minni hækkanir en viðmiðunarstéttum, launahækkunum hafi verið frestað og ríkið reynt að endurheimta ofgreidd laun vegna mistaka í útreikningi.
Í umsögn Dómarafélagsins segir að Feneyjanefnd Evrópuráðsins hafi fallist á að almenn launalækkun opinberra starfsmanna þegar verulega harðni á dalnum megi má til dómara án þess að teljast brot á sjálfstæði þeirra. Þetta eigi þó ekki við um tíðar skerðingar á launahækkunum dómara.
„Ítrekuð inngrip síðustu ár í lögákveðnar launaleiðréttingar dómara hafa helgast að sögn stjórnvalda og þingmanna af því að mikilvægt sé að vinna að stöðugleika í íslensku efnahagslífi. Þau áform hafa ekki gengið eftir og er hér viðvarandi verðbólga og háir vextir. Það er því hið venjubundna ástand á Íslandi og hefur verið um langt skeið.“
Dómarafélagið segir að dómurum hafi hvorki fjölgað né málum fækkað. Raunar sé það svo að þeir hafi ekki notið sömu styttingar vinnutíma og aðrir. Á sama tíma hyggist löggjafinn grípa inn í og handstýra launahækkunum dómara í stað þess að láta viðmið laga um launahækkanir gilda.
