Byggingin sem mun hýsa Náttúruminjasafnið á Seltjarnarnesi er tilbúin,... - MBL.IS

Snýst um að klára verkefnið

Höfuðstöðvarnar sem safnið hyggst flytja í voru upphaflega byggðar árið 2007 í Bygggörðum á Seltjarnarnesi, en framkvæmdir hófust á ný undir lok árs 2023.

„Hönnun sýningarinnar er tilbúin, en það á eftir að fjármagna framkvæmd hennar. Ef við fáum fjármagn getum við hafið uppsetningu sýningarinnar og flutt starfsemina yfir eins og áður stóð til,“ segir Ragnhildur.

Verulegur kostnaður hefur farið í verkefnið að sögn Ragnhildar og snýst þetta bara um að klára það. „Það er mikil samkeppni um þetta fjármagn og mörg önnur brýn verkefni. Aðstæður í samfélaginu eru ekkert sérstaklega hagstæðar núna með verðbólguna eins og hún er þannig að við vitum að staðan er ekki einföld en við teljum að þetta fari inn í fjárlög á næsta ári,“ bætti hún svo við.

Náttúrufræðifélagið var stofnað fyrir 137 árum með það markmið að opna náttúruminjasafn á Íslandi. „137 árum síðar erum við enn að vinna í þessu verkefni, við erum komin með húsnæði og í raun bara í dauðafæri til að klára þetta,“ segir Ragnhildur.

Geirfuglinn var keyptur á uppboði árið 1971 í Bretlandi og verður herbergi tileinkað þessum merka grip á safninu. Það verður svo hluti af stærri sýningu sem heitir Hafið. Þar verður meðal annars beinagrindin af íslandssléttbaknum sem er útdauður og kúfskel sem er elsta þekkta dýr í heiminum og varð 512 ára gamalt.

Staðsetning safnsins þykir afar heppileg, enda er Seltjarnarnes umlukið hafi og húsið stendur á friðlandinu með útsýni að Gróttuvita.

Þrátt fyrir að húsið sé tilbúið og hönnun sýningarinnar klár bíður safnið enn fjárheimilda áður en hægt verður að flytja starfsemina út á nes og opna dyrnar fyrir almenningi.