Karl III Bretakonungur ætlar ekki að flytja inn í Buckingham-höll þegar endurbótum þar lýkur á næsta ári. Höllin hefur verið aðalheimili breskra þjóðhöfðingja í nærri 200 ár.
Búist er við að endurbótum ljúki áratug eftir að þær hófust 2017. Þá verður búið að skipta út raflögnum, vatnsleiðslum og hitakerfum í höllinni. Kostnaðurinn nemur 369 milljónum punda, það eru rúmlega 60 miljarðar króna.
Karl ætlar að búa áfram í Clarance House, sem er í kallfæri frá Buckingham-höll. Þangað flutti hann 2003. Þar bjó áður amma Karls, Elísabet drottningarmóðir, sem lést 2002.
Gegnir enn veigamiklu hlutverki fyrir krúnuna
Þegar framkvæmdir hófust gerðu starfsmenn hirðarinnar ráð fyrir að höllin yrði enn aðalheimili þjóðhöfðingjans í Lundúnum líkt og verið hefur frá embættistöku Viktoríu drottningar 1837.
James Chalmers, féhirðir konungs, segir höllina þó enn verða eins konar höfuðstöðvar konungsveldisins. Hún verði áfram vettvangur formlegra athafna og móttökustaður fyrir opinbera og tigna gesti.
Almenningi hefur gefist kostur á að heimsækja hluta hallarinnar og það gera um 700 þúsund manns á hverju ári. Chalmers segir aðgang almennings eiga eftir að aukast eftir þessar breytingar.
Birti skattaskýrsluna sína í gær
Í gær birti Karl einnig skattaskýrsluna sína, fyrstu konungborinna þjóðhöfðingja í Bretlandi.
Hann hefur greitt yfir 30milljónir punda, eða rúmlega fimm milljarða íslenskra króna, í skatta frá því hann varð konungur í september 2022.
