„Ef ég ætti lítil börn í dag myndi ég frekar vilja að þau reyktu en að vera ein á samfélagsmiðlum.“ Þessi orð lét starfandi forsætisráðherra Danmerkur, Mette Frederiksen, falla á alþjóðlegri ráðstefnu um gervigreind og aðgengi barna að henni í Kristjánsborgarhöll í gær.
Útskýrir afstöðu sína og harmar orðavalið
Síðar hefur Frederiksen beðist afsökunar á orðalaginu. Í færslu á samfélagmiðlum segir hún að auðvitað ættu börn og ungmenni ekki að byrja að reykja. „Þess vegna hefði ég átt að segja eitthvað annað til að undirstrika skoðun mína,“ segir hún í færslunni.
Þá segir Frederiksen að rétt eins og börn ættu ekki að reykja, ættu þau ekki að fá að vera ein á netinu þar sem þau eigi á hættu á að sjá skaðlegt myndefni og geta lent í samskiptum við fólk með illt í huga. Því ætti að setja jafn ströng aldurstakmörk á aðgengi barna að samfélagsmiðlum, og gert hafi verið varðandi reykingar.
Lungnasérfræðingur segir orðalagið óheppilegt
Lungnasérfræðingar og fólk sem beitt hefur sér síðustu áratugi gegn reykingum í Danmörku hefur gagnrýnt orð forsætisráðherrans. DR, danska ríkisútvarpið, hefur eftir Charlottu Pisinger, prófessor, að samanburðurinn hafi verið mjög óheppilegur. Reykingar hafi mjög alvarleg áhrif á heilsu barna. Það taki þó vissulega yfirleitt nokkur ár fyrir alvarlegar afleiðingar reykinga að koma fram, svo sem krabbamein og langvinna lungnateppu.
Þá hafi nikótín skaðleg áhrif heila ungs fólks. Efnið geti aukið hættu á hugrænni skerðingu, kvíða og þunglyndi. Með orðum sínum hafi forsætisráðherrann látið í veðri vaka að það væri ekki skaðlegt að reykja.
